ນັກກີລາເທຄວັນໂດຫຼຽນໂອລິມປິກອີຣ່ານ… ປະກາດໜີຈາກການຖືກກົດຂີ່!!

0
2635

ນາງ ຄີເມຍ ອາລິຊາເດ ນັກກີລາຍິງຄົນດຽວຂອງອີຣ່ານທີ່ໄດ້ຫຼຽນໂອລິມປິກໄດ້ຫຼົບໜີອອກຈາກປະເທດ ແລະ ປະກາດແປພັກແລ້ວ, ໂດຍນາງອ້າງວ່າ: “ໜີອອກຈາກການກົດຂີ່”.

ສຳນັກຂ່າວຕ່າງປະເທດລາຍງານໃນວັນທີ 13 ມັງກອນ 2020 ວ່າ: ນັກກີລາເທຄວັນໂດອາຍຸ 21 ປີຜູ້ສ້າງປະຫວັດສາດເປັນນັກກີລາຍິງຄົນດຽວຂອງປະເທດອີຣ່ານທີ່ຄວ້າຫຼຽນໂອລິມປິກ, ຊຶ່ງນາງຄວ້າໄດ້ຫຼຽນທອງຈາກການແຂ່ງຂັນເມື່ອປີ 2014 ໄດ້ອອກມາປະກາດແປພັກຈາກປະເທດອີຣ່ານແລ້ວ, ໂດຍນາງໄດ້ລະບຸວ່າ: ຕົນເອງເປັນໜຶ່ງໃນແມ່ຍິງອີຣ່ານຈຳນວນຫຼາຍລ້ານຄົນທີ່ຖືກກົດ ຂີ່.

ນາງ ອາລິຊາເດ ຫາຍໂຕໄປຕັ້ງແຕ່ອາທິດກ່ອນທ່າມກາງຂ່າວລືວ່ານາງຫຼົບໜີອອກຈາກປະເທດ, ກ່ອນທີ່ມີກະແສຂ່າວອອກມາເມື່ອວັນທີ 9 ມັງກອນຜ່ານມາໂດຍສຳນັກຂ່າວ ISNA ຂອງອີຣ່ານທີ່ອອກມາລາຍງານວ່າ: “ນາງໄປປາກົດຕົວຢູ່ໃນປະເທດເນເທີແລນ”.

ຫຼ້າສຸດ ນາງ ອາລິຊາເດ ປະກາດເລື່ອງການແປພັກຜ່ານທາງອິນສະຕາແກຣມສ່ວນຕົວໂດຍນາງລະບຸວ່າ: ຕົນເອງບໍ່ຢາກຕົກເປັນສ່ວນໜຶ່ງໃນການຫຼອກລວງ, ການຂີ້ຕົວະ, ຄວາມບໍ່ຍຸຕິທຳ ແລະ ການປະຈົບປະແຈງ ລວມທັງທາງການຂອງປະເທດອິສລາມແຫ່ງນີ້ໄດ້ໃຊ້ຄວາມສຳເລັດຂອງຕົນເອງໃນການໂຄສະນາຊວນເຊື່ອອີກດ້ວຍ.

ຊຶ່ງໃນຂໍ້ຄວາມທີ່ນາງໄດ້ກ່າວກໍຄື: “ຕົນເອງເປັນໜຶ່ງໃນແມ່ຍິງຫຼາຍລ້ານຄົນໃນອີຣ່ານທີ່ຖືກກົດຂີ່ ແລະ ຖືກຫຼອກໃຊ້ມາດົນຫຼາຍປີ, ບໍ່ວ່າຈະສວມໃສ່ສິ່ງໃດກໍຕາມທີ່ເຂົາເຈົ້າໃຫ້ໃສ່ ແລະ ທຸກໆຄຳເວົ້າ-ທຸກໆປະໂຫຍກທີ່ເຂົາເຈົ້າສັ່ງໃຫ້ເວົ້າ… ຊຶ່ງທຸກຄົນບໍ່ມີຄວາມສຳຄັນກັບເຂົເຈົ້າເລີຍ ແລະ ເປັນພຽງເຄື່ອງມືຮັບໃຊ້ເທົ່ານັ້ນ!! ນາງ ອາລິຊາເດ ກ່າວ.

ຢ່າງໃດກໍຕາມ ອາລິຊາເດ ກໍໄດ້ກ່າວຕື່ມວ່າ: ເຖິງແມ່ນວ່າລັດຖະບານຈະໃຊ້ປະໂຫຍດຈາກຄວາມສຳເລັດດ້ານກີລາຂອງຕົນເອງໄປກັບເລື່ອງທາງການເມືອງ, ເຂົາເຈົ້າກໍຍັງດູໝິ່ນຕົນເອງດ້ວຍຄຳເວົ້າຕ່າງໆນາໆເຊັ່ນ: ເປັນເລື່ອງທີ່ບໍ່ຖືກຕ້ອງທີ່ແມ່ຍິງຈະໄປ “ຢືດແຂ່ງຢືດຂາ” ແຕ່ອາລິຊາເດກໍຢືນຢັນວ່າ: ນາງບໍ່ໄດ້ຮັບຄຳເຊີນຊວນຈາກຊາຍເອີຣົບ ຫຼື ໄດ້ຮັບຂໍ້ສະເໜີໃດໆ ແລະ ບໍ່ລະບຸອີກວ່າຕອນນີ້ຕົນເອງຢູ່ໃສ?.

ທັງນີ້ ອາລິຊາເດ ບໍ່ໄດ້ເປີດເຜີຍແຜນການໃນອະນາຄົດຂອງນາງໃນອິນສະຕາແກຣມ ລວມເຖິງເລື່ອງທີ່ນາງຈະເຂົ້າຮ່ວມການແຂ່ງ ຂັນໂອລິມປິກ 2020 ທີ່ນະຄອນໂຕກຽວ ປະເທດຍີ່ປຸ່ນ ຫຼື ບໍ່? ແຕ່ນາງກໍຢໍ້າວ່າ: “ບໍ່ວ່ານາງຈະຢູ່ແຫ່ງຫົນໃດກໍຕາມ ນາງຈະຍັງຄົງເປັນແມ່ຍິງຂອງປະເທດອີຣ່ານສະເໝີ”.

 

ຮຽບຮຽງ: ເພັງສະຫວັນ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.