ທ່ານຄິດວ່າສົມຄວນ ຫຼື ບໍ່? ທີ່ຕັ້ງເງື່ອນໄຂກ່ອນຈະຮັບບໍລິຈາກ

0
419

ຖືເປັນເລື່ອງລາວທີ່ກຳລັງເປັນກະແສໃນສັງຄົມອອນລາຍກ່ຽວກັບກໍລະນີການໂພສເພື່ອລະດົມທຶນຊ່ວຍເຫຼືອຜູ້ປະສົບໄພຜ່ານທາງ ເພຈເຟສບຸ໊ກ ແລະ ອື່ນໆ ຊຶ່ງກໍເປັນເລື່ອງທີ່ຄວນໃຫ້ການສະໜັບສະໜູນ ແລະ ຊ່ວຍເຫຼືອກັນໃນຍາມຕົກທຸກໄດ້ຍາກ ແຕ່ກໍມີ ບາງເພຈ ບາງກຸ່ມຄົນທີ່ສວຍໃຊ້ວິກິດໃຫ້ເປັນໂອກາດຫາຜົນປະໂຫຍດເຂົ້າຕົວ ໂດຍການຫວັງເພີ່ມຍອດ Like ຍອດ Share ໃຫ້ກັບເພຈຂອງຕົນເອງ ເພື່ອຫວັງຕໍ່ຍອດໃນທຸລະກິດໃດໆກໍແລ້ວແຕ່ ຊຶ່ງການກະທຳດັ່ງກ່າວຖືວ່າເປັນການເຫັນແກ່ໂຕ ແລະ ເອົາປຽບຄົນອື່ນໃນທາງອ້ອມ ຫຼື ບໍ່?.

ບໍ່ສະເພາະແຕ່ຢູ່ໃນ ສປປ ລາວ ເທົ່ານັ້ນ ຊຶ່ງຢູ່ໃນຫຼາຍປະເທດທົ່ວໂລກທີ່ເກີດກໍລະນີ ຫຼື ເຫດການຮ້າຍແຮງຕ່າງໆນາໆ ກໍຈະມີບາງກຸ່ມຄົນທີ່ອອກມາສະແດງຕົວ ແລະ ນຳໃຊ້ວິທີແບບນີ້ເພື່ອຜົນປະໂຫຍດແອບແຝງ? ດັ່ງໃນກໍລະນີທີ່ເກີດຂຶ້ນເມື່ອປີ 2013 ໂດຍເວັບໄຊຊື້-ຂາຍສິນຄ້າ online ຂອງອົສຕຣາລີໄດ້ອອກມາຂໍໂທດທີ່ສວຍໃຊ້ວິກິດໄຟໄໝ້ປ່າໃນ Tasmania ເພື່ອພະຍາຍາມເພີ່ມຈຳນວນຜູ້ຕິດຕາມໃນເພຈເຟສບຸ໊ກຂອງຕົນເອງ ລາຍງານຂ່າວໄດ້ລະບຸວ່າ Sellitonline.com.au ຈະມອບເຄື່ອງຈັກຜະລິດໄຟ ຟ້າເພື່ອຊ່ວຍເຫຼືອຜູ້ທີ່ຢູ່ໃນ Tasmania ໂດຍບໍ່ຕ້ອງໃຊ້ພະລັງງານ ຊຶ່ງໃນເພຈໄດ້ໂພສຂໍ້ຄວາມທີ່ວ່າ “ສິ່ງທີ່ພວກເຮົາຕ້ອງການໃຫ້ທ່ານເຮັດແມ່ນເຮັດໃຫ້ໝູ່ທຸກຄົນຂອງທ່ານເຂົ້າຮ່ວມໃນເພຈ Facebook page sellitonline ແລະ ຫາກມີຄົນເພີ່ມຫຼາຍຂຶ້ນພວກເຮົາຈະພິຈາລະນາຈຳນວນເຄື່ອງຈັກໄຟຟ້າທີ່ຈະໄປມອບວ່າຄວນມີຈັກເຄື່ອງ”.

ໂພສດັ່ງກ່າວໄດ້ຖືກວິພາກວິຈານໃນທາງລົບ ໂດຍມີຜູ້ໃຊ້ເຟສບຸ໊ກຄົນໜຶ່ງກ່າວຕຳນິວ່າ “ຢ່ານຳໃຊ້ສື່ສັງຄົມອອນລາຍເພື່ອຫາຜົນປະໂຫຍດໃຫ້ແກ່ຕົນເອງ” ແລະ ມີຜູ້ໃຊ້ເຟສບຸ໊ກອີກຄົນກ່າວໄປແບບຕົງໆວ່າ “F*** ປິດໃຊ້ການຕະຫຼາດແບບສວຍໂອກາດຂອງທ່ານທີ່ພະຍາຍາມໃຊ້ປະໂຫຍດຈາກຄວາມເດືອດຮ້ອນຂອງຄົນອື່ນ” ພາຍຫຼັງຈາກຖືກວິພາກວິຈານຢ່າງໜັກຈາກສັງຄົມ Sellitonline.com.au ກໍໄດ້ອອກມາລົບໂພສ ພ້ອມທັງຂໍໂທດກັບເລື່ອງທີ່ເກີດຂຶ້ນທຸກກໍລະນີ.

ສຳລັບຢູ່ໃນປະເທດລາວເລື່ອງແບບນີ້ຍັງມີໃຫ້ເຫັນເປັນປະຈຳ ໂດຍສະເພາະແມ່ນຍາມທີ່ປະເທດເກີດໄພພິບັດຕ່າງໆບໍ່ວ່າຈະເປັນນໍ້າຖ້ວມ ຫຼື ໄຟໄໝ້ ພະຍຸພັດຖະຫຼົ່ມ ແລະ ອື່ນໆ ກໍຈະມີບາງກຸ່ມຄົນ ບາງຫົວໜ່ວຍທຸລະກິດທີ່ເຮັດການຕະຫຼາດແອບແຝງມາໃນຮູບ ແບບການລະດົມທຶນ ແລະ ທຸກຄັ້ງທີ່ເຫັນຕາມໜ້າເຟສບຸ໊ກໃນກໍລະນີນີ້ຈະເກີດມີຄຳຖາມຕາມມາຫຼາຍຄຳຖາມ ທ່ານຄິດແນວໃດ? ກັບ 1 Kike 1 Share ເພື່ອຊ່ວຍຜູ້ປະສົບໄພ 1 Like =…? 1 Share =….? ແລ້ວຖ້າບໍ່ມີຄົນເຂົ້າໄປກົດ Like ກົດ Share ເພຈ ຫຼື ບໍ່ລິສັດດັ່ງກ່າວຈະບໍລິຈາກເງິນຊ່ວຍເຫຼືອ ຫຼື ບໍ່? ເປັນຫຍັງການເຮັດບຸນ ການຊ່ວຍເຫຼືອເຖິງມີເງື່ອນໄຂ? ຈະເປັນໄປໄດ້ບໍ່? ຖ້າຢາກຊ່ວຍເຫຼືອສັງຄົມ ຫຼື ຜູ້ປະສົບໄພທີ່ກຳລັງຕ້ອງການຄວາມຊ່ວຍເຫຼືອແທ້ກໍຄວນແຈ້ງເຈດຈຳນົງ ຫຼື ສົ່ງມອບ ໃຫ້ເຂົາເຈົ້າໂດຍກົງໂດຍບໍ່ຕ້ອງມີເງື່ອນໄຂໃດໆ.

ກໍລະນີແບບນີ້ມັນກໍເປັນເລື່ອງທີ່ຫຼາຍຄົນປ່ອຍຜ່ານ ແລະ ບໍ່ຄ່ອຍສົນໃຈ ແຕ່ຫາກລອງວິເຄາະດີໆແລ້ວມັນກໍເປັນເລື່ອງທີ່ບໍ່ສົມ ຄວນເຮັດ ໂດຍສະເພາະການສວຍໂອກາດເພີ່ມຍອດຄົນຕິດຕາມຈາກຄວາມເດືອດຮ້ອນຂອງຜູ້ອື່ນ ເຖິງແມ່ນວ່າທ່ານຈະມີເຈດ ຕະນາທີ່ຈະມອບເງິນທີ່ໄດ້ມາຈາກການມີຄົນເຂົ້າມາກົດ Like ກົດ Share ໃນເພຈຂອງທ່ານກໍຕາມ ໂດຍສະເພາະຜູ້ເຮັດທຸລະ ກິດກໍຄວນມີຈັນຍາບັນໃນການນຳສະເໜີ ຊຶ່ງຖ້າຫາກທ່ານມີໃຈບໍລິສຸດຢາກບໍລິຈາກກໍຄວນນຳເງິນ ຫຼື ວັດຖຸສິ່ງຂອງໄປບໍລິຈາກໂດຍກົງເລີຍ ບໍ່ຈຳເປັນຕ້ອງຕັ້ງເງື່ອນໄຂໃດໆຂຶ້ນມາເພື່ອເຈດຕະນາອື່ນໆທີ່ແອບແຝງ.

 

 

ຂ່າວໂດຍ: ບຸດສະດີ ສາຍນໍ້າມັດ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.