ທົ່ວປະເທດກຽມຮັບມືກັບພະຍຸໝູນເຂດຮ້ອນ “ວິພາ” ໄລຍະ 3-5 ສິງຫານີ້

0
583

ໃນວັນທີ 31 ກໍລະກົດ 2019 ກົມອຸຕຸນິຍົມ ແລະ ອຸທົກກະສາດໄດ້ແຈ້ງເຕືອນໄພພະຍຸໝູນເຂດຮ້ອນ “ວິພາ” ຫົວທີ 7 ປະຈຳປີ 2019 ຊຶ່ງມີຈຸດສູນກາງຢູ່ເສັ້ນຂະໜານ 19.1 ອົງສາເໜືອ ແລະ ເສັ້ນແວງທີ 113.1 ອົງສາຕາເວັນອອກ ທີ່ພວມເຄື່ອນທີ່ໄປທາງທິດຕາເວັນຕົກ-ຕາເວັນຕົກສຽງເໜືອດ້ວຍຄວາມໄວ 15 ກີໂລແມັດຕໍ່ຊົ່ວໂມງ ເນື່ອງຈາກພາຍຸຫົວນີ້ຈະເຄື່ອນຜ່ານເກາະໄຮໜານ ແລະ ຈະມີທ່າອຽງເຄື່ອນເຂົ້າຝັ່ງທາງພາກເໜືອຂອງ ສສ ຫວຽດນາມ ໃນໄລຍະວັນທີ 1-2 ສິງຫາ 2019 ນີ້ ຈາກທ່າອຽງການເຄື່ອນທີ່ຂອງພະຍຸຸຫົວນີ້ ສົ່ງຜົນໃຫ້ໃນໄລຍະວັນທີ 3-5 ສິງຫາ 2019 ຈະເກີດລົມມໍລະສຸມຕາເວັນຕົກມີກຳລັງແຮງເພີ່ມຂຶ້ນປົກຄຸມຢູ່ພາກເໜືອຫາພາກກາງ ພ້ອມນີ້ ກໍຈະເຮັດໃຫ້ມີຝົນຕົກໃນລະດັບຄ່ອຍຫາປານກາງເປັນບໍລິເວນກວ້າງ ແລະ ຕົກໜັກຢູ່ບາງທ້ອງຖິ່ນແຂວງພາກເໜືອລົງຫາພາກກາງ ແລະ ພາກໃຕ້.

ດັ່ງນັ້ນ ຈຶ່ງແຈ້ງເຕືອນເຖິງອຳນາດການປົກຄອງທຸກພາກສ່ວນ ແລະ ປະຊາຊົນບັນດາເຜົ່າທີ່ອາໄສຢູ່ແຂວງຜົ້ງສາລີ ຫົວພັນ ຊຽງຂວາງ ຫຼວງນໍ້າທາ ອຸດົມໄຊ ບໍ່ແກ້ວ ຫຼວງພຣະບາງ ໄຊຍະບູລີ ໄຊສົມບູນ ວຽງຈັນ ບໍລິຄຳໄຊ ຄຳມ່ວນ ສະຫວັນນະເຂດ ລວມທັງນະຄອນຫຼວງວຽງຈັນ ສາລະວັນ ​ຈຳປາສັກ ເຊກອງ ແລະ ອັດຕະປື ໃຫ້ມີສະຕິລະມັດລະວັງຕໍ່ສະພາບດິນເຈື່ອນ ແລະ ເຫດການຕ່າງໆທີ່ອາດເກີດຂຶ້ນແບບກະທັນຫັນ.

 

ຮຽບຮຽງຂ່າວ:​ ບຸດສະດີ ສາຍນໍ້າມັດ
ແຫຼ່ງຂໍ້ມູນ: ກົມອຸຕຸນິຍົມ ແລະ ອຸທົກກະສາດ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.