ທາງລົດໄຟລາວ-ຈີນລົງມືແລ້ວ ມູນຄ່າ 5.8 ຕື້ໂດລາ ຄາດສຳເລັດປີ 2021

0
1383

ຂປລ. ລັດຖະບານລາວລັ່ນຄອ້ງເປີດການກໍ່ສ້າງເສັ້ນທາງລົດໄຟລາວ-ຈີນຢ່າງທາງການໃນຕອນເຊົ້າຂອງວັນທີ 25 ທັນວາ 2016 ນີ້ ທີ່ແຂວງຫລວງພະບາງ, ຄາດຄະເນການລົງມືກໍ່ສ້າງໄດ້ກຳນົດເວລາ 60 ເດືອນ ແລະ ຈະສຳເລັດສົມບູນໃນທ້າຍປີ 2021.

ພິທີເປີດການກໍ່ສ້າງໂຄງການທາງລົດໄຟ ລາວ-ຈີນຄັ້ງນີ້ກໍໄດ້ມີທາງສາສະໜາ ແລະ ລັ່ນຄ້ອງເອົາເລີກເອົາຍາມ ໂດຍເປັນກຽດເຂົ້າຮ່ວມຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ທ່ານ ສົມສະຫວາດ ເລັ່ງສະຫວັດ ທີ່ປຶກສາ ຄະນະບໍລິຫານງານສູນກາງພັກ ພ້ອມບັນດາ ທ່ານ ເອກອັກຄະລັດຖະທູດຈີນ ປະຈຳລາວ, ທ່ານລັດຖະມົນຕີ,ຮອງລັດຖະມົນຕີ, ເຈົ້າແຂວງ, ຮອງເຈົ້າແຂວງ-ນະຄອນຫລວງວຽງຈັນ, ອົງການຈັດຕັ້ງທຽບເທົ່າ ແລະ ຜູ້ຕາງໜ້າຈາກລັດວິສາຫະກິດລົດໄຟແຫ່ງຊາດ ສປ ຈີນເຂົ້າຮ່ວມ.

ທ່ານ ບຸນຈັນ ສິນທະວົງ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ທັງເປັນຫົວໜ້າຄະນະຊີ້ນໍາໂຄງການກໍ່ສ້າງທາງລົດໄຟ ລາວ-ຈີນ ໄດ້ກ່າວວ່າ: ມາດຕະຖານດ້ານເຕັກນິກ ການອອກແບບໂຄງການກໍ່ສ້າງທາງລົດໄຟ ລາວ-ຈີນ ແຕ່ບໍ່ເຕັນ (ຊາຍແດນລາວ-ຈີນ) ຫາສະຖານີນະຄອນຫລວງວຽງຈັນ ຄວາມຍາວ 417 ກວ່າກິໂລແມັດ ເຊິ່ງໄດ້ອອກແບບເປັນ ທາງລົດໄຟມາດຕະຖານຊັ້ນ 1 ປະເພດລາງດ່ຽວ. ການກໍານົດຄວາມໄວອອກແບບ ສໍາລັບຂົນສົ່ງໂດຍສານເຂດພູດອຍແມ່ນ 160 ກິໂລແມັດຕໍ່ຊົ່ວໂມງ, ຢູ່ເຂດທົ່ງພຽງແມ່ນ 200 ກິໂລແມັດຕໍ່ຊົ່ວໂມງ ແລະ ຄວາມໄວອອກແບບສຳລັບການຂົນສົ່ງສິນຄ້າ 120 ກິໂລແມັດຕໍ່ຊົ່ວໂມງ. ການກໍ່ສ້າງປະກອບມີກໍ່ສ້າງຂົວ 167 ແຫ່ງຍາວ 61 ກວ່າກິໂລແມັດ ກວມ 14,9%, ກໍ່ສ້າງທໍ່ 649 ແຫ່ງຍາວ 20ກິໂລແມັດ, ກໍ່ສ້າງອຸມົງ 75 ແຫ່ງ ຍາວ 197 ກິໂລແມັດ ກວມ 47,7%, ໃນນີ້ ອຸມົງທີ່ມີຄວາມຍາວກວ່າໝູ່ແມ່ນປະມານ 12 ກິໂລແມັດ ຢູ່ເມືອງກາສີ ແຂວງວຽງຈັນ, ມີສະຖານີທັງໝົດ 32 ແຫ່ງ, ໃນນີ້ມີ 21 ສະຖານີສຳລັບ ລົດໄຟຫລີກກັນ, ມີ 11 ສະຖານີໂດຍສານ ແລະ ລວມສະຖານີສິນຄ້າອີກ 1 ແຫ່ງລວມມູນຄ່າກໍ່ສ້າງຂອງໂຄງການ 5.8 ຕື້ໂດລາສະຫະລັດ.
ປະຈຸບັນ, ໄດ້ສຳເລັດການສ້າງຕັ່ງ ບໍລິສັດ ຮ່ວມທຶນທາງລົດໄຟ ລາວ-ຈີນ, ການປະມູນຈັດຊື້-ຈັດຈ້າງ ກັບບັນດາບໍລິສັດຮັບເໜົາກໍ່ສ້າງ ແລະ ບໍລິສັດທີ່ປຶກສາ ແລະ ເຊັນສັນຍາ ກັບບໍລິສັດຮັບເໝົາກໍ່ສ້າງຫລັກ 6 ສັນຍາ, ບໍລິສັດທີ່ປຶກສາ 3 ສັນຍາ ແລະ ທີ່ປຶກສາບຸກຄົນທີສາມ 3 ສັນຍາ; ຄາດຄະເນການລົງມືກໍ່ສ້າງ ທີ່ກຳນົດເວລາ 60 ເດືອນ ແລະ ຈະສຳເລັດສົມບູນໃນທ້າຍປີ 2021 ມາຮອດມື້ນີ້ ຖືວ່າການກະກຽມເງື່ອນໄຂຕ່າງໆ ໃຫ້ແກ່ການລົງມືກໍ່ສ້າງທັງໝົດ 6 ໄລຍະແມ່ນຄົບຖ້ວນສົມບູນແລ້ວ.
ທ່ານ ລັດຖະມົນຕີ ກະຊວງໂຍທາທິການ ແລະ ຂົນສົ່ງຍັງກ່າວວ່າ: ການພັດທະນາພື້ນຖານໂຄງລ່າງເສັ້ນທາງລົດໄຟດັ່ງກ່າວນີ້ ແມ່ນມີຄວາມສຳຄັນຕໍ່ການ ຈັດຕັ້ງຜັນຂະຫຍາຍມີຕິ X ຂອງພັກ ເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ, ເປັນການເພີ່ມທະວີການເປີດກວ້າງ ແລະ ຍົກລະດັບການຮ່ວມມືດ້ານເສດຖະກິດ, ການຄ້າ, ການລົງທຶນ ແລະ ການທ່ອງທ່ຽວຂອງສອງປະເທດ ເວົ້າສະເພາະ, ເວົ້າລວມ ແມ່ນເປັນການເພີ່ມທະວີການພົວພັນ ທາງດ້ານເສດຖະກິດຢູ່ໃນເຂດການຄ້າເສລີ ຈີນ-ອາຊຽນ ອີກດ້ວຍ ພາຍຫລັງສຳເລັດການກໍ່ສ້າງຈະນຳຜົນປະໂຫຍດອັນໃຫຍ່ຫລວງມາສູ່ປະຊາຊົນລາວບັນດາເຜົ່າແລະ ຈະເຮັດໃຫ້ການຄົມມະນາຄົມ-ຂົນສົ່ງ, ການໄປມາຫາສູ່ກັນມີຄວາມສະດວກ,ວອງໄວ ແລະ ປອດໄພ, ສາມາດປະຢັດຕົ້ນທຶນການຂົນສົ່ງ, ທັງເປັນການສົ່ງເສີມການທ່ອງທ່ຽວ, ການຄ້າ-ການລົງທຶນ ໃຫ້ຂະຫຍາຍຕົວຂຶ້ນ ພ້ອມທັງຈະກະຕຸກຊຸກຍູ້ ການພັດທະນາຂະແໜງການອື່ນໆ ເຊັ່ນ: ຂະແໜງກະສິກຳ, ອຸດສະຫະກຳ-ການຄ້າ, ການລົງທຶນ ແລະ ທ່ອງທ່ຽວ ໃຫ້ມີການຂະຫຍາຍຕົວສູງ ແລະ ສາມາດສ້າງລາຍຮັບ ໃຫ້ແກ່ປະເທດຊາດ ແລະປະຊາຊົນ ໃນສະເພາະໜ້າ ແລະ ຍາວນານ.

15740977_590588754478242_8530294182231899756_n 15698096_590588761144908_1789269599771364351_n 15740862_590588831144901_1302125555804819586_n 15740943_590588757811575_7432961229308446502_n

ຂ່າວແລະຮູບ: ຈາກສຳນັກຂ່າວສານປະເທດລາວ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.