ຖະແຫຼງຂ່າວຈັດຕັ້ງຄະນະບໍລິຫານສະຫະພັນກີລາຄິກບ໋ອກຊິງແຫ່ງຊາດລາວ

0
60

ເມື່ອວັນທີ 3 ກໍລະກົດຜ່ານມາທີ່ຫ້ອງປະຊຸມຄະນະກຳມະການໂອແລມປິກແຫ່ງຊາດລາວ (ສະໜາມກີລາເຈົ້າອານຸວົງ) ໃຫ້ກຽດເຂົ້າຮ່ວມໂດຍ ທ່ານ ບົວລານ ສິລິປັນຍາ ຮອງລັດຖະມົນຕີກະຊວງສຶກສາທິການ ແລະ ກີລາ ທ່ານ ຊົມພູ ພົງສາ ຮອງປະທານ ແລະ ເລຂາທິການ ຄອລ ທ່ານ ແສງພອນ ພົມອາມາດ ຫົວໜ້າກົມກີລາລະດັບສູງ ທ່ານ ສຸລີ ມີລະໄມ ຮອງປະທານສະຫະພັນຄິກບ໋ອກຊິງແຫ່ງຊາດລາວ ທ່ານ ວັນນະເດດ ແກ້ວວຽງຄຳ ປະທານສະຫະພັນຄິກບ໋ອກຊິງແຫ່ງຊາດລາວ ມີບັນດາພາກສ່ວນກ່ຽວ ຂ້ອງ ພ້ອມດ້ວຍນັກກີລາເຂົ້າຮ່ວມ.

ໂອກາດດັ່ງກ່າວ ທ່ານ ບົວລານ ໄດ້ກ່າວວ່າ ເພື່ອເຮັດໃຫ້ການຈັດຕັ້ງປະຕິບັດວຽກງານຂອງສະຫະພັນກີລາຄິກບ໋ອກຊິງແຫ່ງຊາດລາວໄດ້ຮັບໝາກຜົນໃນຕໍ່ໜ້າ ຂ້າພະເຈົ້າຈຶ່ງຂໍມີຄຳເຫັນດັ່ງຕໍ່ໄປນີ້

  1. ໃຫ້ພາກສ່ວນກ່ຽວຂ້ອງເອົາໃຈໃສ່ຈັດຕັ້ງຜັນຂະຫຍາຍແນວທາງນະໂຍບາຍ ໂດຍສະເພາະແຜນຍຸດທະສາດພັດທະນາກີລາ-ກາຍຍະກຳລາວແຕ່ນີ້ຮອດປີ 2020 ແລະ ວິໄສທັດຂອງສະຫະພັນກີລາທີ່ວາງອອກ ໂດຍປະສານສົມທົບກັບບັນດາອົງການຈັດຕັ້ງທັງພາກລັດ ອົງການຈັດຕັ້ງທາງສັງຄົມ ອົງການຈັດຕັ້ງເອກະຊົນ ແລະ ອື່ນໆເພື່ອເຮັດໃຫ້ການເຄື່ອນໄຫວກິດຈະກຳຕ່າງໆມີຄວາມສະດວກ ແລະ ບໍ່ເກີດບັນຫາ.
  2. ໃຫ້ເອົາໃຈໃສ່ການປະສານງານກັບພາກລັດ ໂດຍສະເພາະກະຊວງສຶກສາທິການ ແລະ ກີລາ ລວມເຖິງຄະນະກຳມະການໂອແລມປິກແຫ່ງຊາດລາວໃນການເຄື່ອນໄຫວກິດຈະກຳການເຂົ້າຮ່ວມແຂ່ງຂັນ ການຈັດການແຂ່ງຂັນໃນລະດັບຕ່າງໆ.
  3. ໃຫ້ເອົາໃຈໃສ່ໃນການປະສານງານຮ່ວມມືກັບບັນດາອົງການຈັດຕັ້ງທັງພາຍໃນ ແລະ ຕ່າງປະເທດເພື່ອຍາດແຍ່ງການຊ່ວຍເຫຼືອດ້ານທຶນ ແລະ ອື່ນໆ.
  4. ໃຫ້ເອົາໃຈໃສ່ໃນການພັດທະນາບຸກຄະລາກອນການກີລາ ດ້ານຜູ້ບໍລິຫານ ຄູຝຶກ ກຳມະການຕັດສິນ ພ້ອມນີ້ ກໍຕ້ອງສ້າງໃຫ້ມີລະບົບການພັດທະນານັກກີລາຢ່າງຕໍ່ເນື່ອງເພື່ອໃຫ້ເກີດຄວາມຍືນຍົງ.

ທັງນີ້ ສະຫະພັນຄິກບ໋ອກຊິງແຫ່ງຊາດລາວໄດ້ຖືກຮັບຮູ້ການເປັນສະມາຊິກຈາກສະຫະພັນກີລາຄິກບ໋ອກຊິງອາຊີເມື່ອປີ 2013 ໂດຍການເຫັນດີຈາກກະຊວງສຶກສາທິການ ແລະ ກີລາ ມາຮອດປັດຈຸບັນ ບັນດາສະໂມສອນກີລາ ບຸກຄະລາກອນກີລາ ແລະ ນັກກີລາໄດ້ຮັບຮູ້ຫຼາຍຂຶ້ນ ແລະ ມີຄວາມສົນໃຈທີ່ຈະເຂົ້າມາຮ່ວມພັດທະນາ ຂະນະທີ່ສະຫະພັນກໍມີຄວາມພ້ອມຫຼາຍດ້ານທີ່ຈະຂັບເຄື່ອນກີລາຄິກບ໋ອກຊິງລາວໃຫ້ໄດ້ມາດຕະຖານສາກົນ.

 

 

ໂດຍ: ສະຫະລັດ ວອນທິວົງໄຊ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.