ຕຳຫຼວດເລັ່ງຕິດຕາມລົດທີ່ຕຳ 2 ແມ່ລູກເສຍຊີວິດທີ່ 3 ແຍກໂພນປ່າເປົ້າມາລົງໂທດ

0
1770

ພະແນກຕຳຫຼວດຈະລາຈອນ ນະຄອນຫຼວງວຽງຈັນ ເລັ່ງຕິດຕາມຜູ້ຂັບຂີ່ລົດໃຫຍ່ທີ່ເກີດອຸບັດຕິເຫດຕຳລົດຈັກເວບ 100 ຢູ່ສາມແຍກບ້ານ ໂພນປ່າເປົ້າ ເມືອງ ສີສັດຕະນາກ ນະຄອນຫຼວງວຽງຈັນ, ເຮັດໃຫ້ສອງແມ່ລູກເສຍຊີວິດຄາທີ່ ມາດຳເນີນຄະດີຕາມລະບຽບກົດໝາຍໂດຍໄວ.

ເຈົ້າໜ້າທີ່ພະແນກຕຳຫຼວດຈະລາຈອນ ນະຄອນຫຼວງວຽງຈັນ ໄດ້ເປີດເຜີຍໃຫ້ຮູ້ວ່າ: ເຫດເກີດເວລາປະມານ 6:50 ໂມງເຊົ້າ ຂອງວັນທີ 06/07/2016 ໄດ້ເກີດອຸບັດຕິເຫດລົດກະບະ ຄ້າຍຄືລົດຮຸນໄດ ຕຳລົດຈັກເວບ 100 ໝາຍເລກທະບຽນ ຍຜ 7332 ກຳແພງນະຄອນ ເຮັດໃຫ້ຜູ້ຂັບຂີ່ ຊື່ ນາງ ທິບພະຈັນ ອາຍຸ 35 ປີ, ຢູ່ບ້ານ ໂພນປ່າເປົ້າ ພ້ອມກັບລູກສາວ ຊື່ ນາງ ຮັນນີ ອາຍຸ 8 ປີ ເສຍຊີວິດຄາທີ່, ຜ່ານການລົງເກັບກຳຂໍ້ມູນຫຼັກຖານ ແລະ ຜົນການສັນນະສູດໃນຈຸດເກີດເຫດ ຈຶ່ງຮູ້ວ່າລົດຈັກທີ່ເກີດອຸບັດຕິເຫດ ໄດ້ຂັບຂີ່ມຸ້ງໜ້າມາແຕ່ທາງໂຮງໝໍເສດຖາ ພໍມາຮອດ 3 ແຍກໂພນປ່າເປົ້າ ຜູ້ຂັບຂີ່ລົດຈັກໄດ້ຈອດລົດ ເພື່ອຈະລ້ຽວຊ້າຍຂື້ນໄປທາງໂຮງໝໍ 103, ແຕ່ໃນເວລານັ້ນໄດ້ມີລົດກະບະຄ້າຍຄືລົດຮຸນໄດ ບໍ່ຮູ້ປ້າຍທະບຽນ ຂັບຂີ່ມາໃນທິດທາງດຽວກັນ ດ້ວຍຄວາມໄວ ແລ້ວມາຕຳເອົາລົດຈັກ ເຮັດໃຫ້ນາງ ຮັນນີ ເຊິ່ງເປັນລູກສາວ ໄດ້ຕົກລົງຈາກລົດຈັກແລ້ວລົດໃຫຍ່ຄູ່ກໍລະນີໄດ້ຢຽບເສຍຊີວິດຄາທີ່, ສ່ວນຜູ້ເປັນແມ່ ນາງ ທິບພະຈັນ ຖືກລົດຄັນດັ່ງກ່າວລາກໄປຕາມທາງປະມານ 100 ກວ່າແມັດ ຈົນເສຍຊີວິດເຊັ່ນກັນ, ຈາກນັ້ນຜູ້ຂັບຂີ່ລົດກະບະ ຄ້າຍຄືລົດຮຸນໄດ ກໍ່ໄດ້ຂີ່ລົດຫຼົບໜີໄປເລີຍ.

ເຈົ້າໜ້າທີ່ໃຫ້ຮູ້ຕື່ມອີກວ່າ: ຄະດີອຸບັດຕິເຫດດັ່ງກ່າວນີ້, ເຈົ້າໜ້າທີ່ພະແນກຕຳຫຼວດຈະລາຈອນ ນະຄອນຫຼວງວຽງຈັນ ພວມເລັ່ງຕິດຕາມຫາລົດຄັນດັ່ງກ່າວ ພ້ອມທັງຮຽກຮ້ອງທົ່ວສັງຄົມຊ່ວຍກັນຕິດຕາມ ຖ້າໃຜພົບເຫັນໃຫ້ແຈ້ງເຈົ້າໜ້າທີ່ ເພື່ອນຳກັກຕົວຜູ້ກໍ່ເຫດໃນຄັ້ງນີ້ມາດຳເນີນຕາມລະບຽບກົດໝາຍຂອງ ສປປ ລາວ ແລະ ຮັບຜິດຊອບຕໍ່ກັບເຫດການທີ່ຜູ້ກ່ຽວໄດ້ກໍ່ຂື້ນ.

+ຂ່າວຈາກ: ໜັງສືພີມ ປກສ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.