ດ່ານພາສີສາກົນປາກຊັນເກັບລາຍຮັບບໍ່ໄດ້ຕາມແຜນຍ້ອນນຳເຂົ້າສິນຄ້າຫຼຸດລົງ

0
86

ດ່ານພາສີສາກົນປາກຊັນ ແຂວງບໍລິຄຳໄຊ ເປັນອີກດ່ານໜຶ່ງທີ່ມີການບໍລິການສິນຄ້າ ມີເສັ້ນທາງເຊື່ອມຕໍ່ລະຫວ່າງ ໄທ-ລາວ-ຫວຽດນາມ ຈຶ່ງກາຍເປັນປະຕູເສດຖະກິດ ການບໍລິການທາງຜ່ານ ອັນໄດ້ສ້າງເງື່ອນໄຂໃຫ້ແກ່ການຄ້າ ການລົງທຶນ ການທ່ອງທ່ຽວໃນປີຜ່ານມາມີບັນຍາກາດຟົດຟື້ນ ແລະ ເຮັດໃຫ້ການຈັດເກັບລາຍຮັບເຂົ້າງົບປະມານແຫ່ງລັດໄດ້ເກີນຄາດໝາຍ ແຕ່ໃນປີ 2019 ດ່ານພາສີສາກົນປາກຊັນ ໂດຍສະເພາະການນຳເຂົ້າປະເພດນ້ຳມັນເຊື້ອໄຟ ພາຫະນະ ສິ້ນສ່ວນອາໄຫຼ່ ແກັສ ເຄື່ອງໃຊ້ໄຟ ຟ້າ ສິນຄ້າປະເພດອື່ນໆມີລັກສະນະຫຼຸດລົງ ເປັນສາເຫດຫຼັກເຮັດໃຫ້ດ່ານພາສີສາກົນປາຊັນບໍ່ສາມາດປະຕິບັດລາຍຮັບໄດ້ຕາມແຜນການຕາມທີ່ໄດ້ຮັບມອບໝາຍຄື 302 ຕື້ກີບ ເພາະໃນ 8 ເດືອນຜ່ານມາສາມາດປະຕິບັດໄດ້ພຽງແຕ່ 132 ຕື້ກວ່າກີບ ເທົ່າກັບ 43,81% ຂອງແຜນການປີ ແຕ່ຖ້າທຽບໃສ່ໄລຍະດຽວກັນຂອງປີຜ່ານມາເທົ່າກັບ 57,68% ຫຼຸດລົງ 42,32% ຖ້າຄິດເປັນເງິນປະມານ 97,2 ຕື້ກວ່າກີບ.

ທ່ານ ໄຊຊະນະ ວົງຊົມພູ ຮອງຫົວໜ້າດ່ານພາສີສາກົນປາກຊັນກ່າວວ່າ ດ່ານພາສີສາກົນປາກຊັນໄດ້ເນັ້ນໃສ່ຂອດການບໍລິການໃຫ້ມີຄວາມສະດວກວ່ອງໄວ ມີຄວາມໂປ່ງໃສ ແຕ່ສາເຫດຫຼັກທີ່ພາໃຫ້ເກັບລາຍຮັບບໍ່ໄດ້ຕາມແຜນແມ່ນມາຈາກການນໍາເຂົ້ານໍ້າມັນເຊື້ອໄຟຫຼຸດລົງ ໂດຍສະເພາະໂຄງການກໍ່ສ້າງເຂື່ອນໄຟຟ້າງຽບ 1 ແລະ ໂຄງການພູ້ເບ້ຍມາຍນິງຫຼຸດລົງ ເຫັນໄດ້ໃນຕົວເລກ 8 ເດືອນປີ 2018 ການນຳເຂົ້າມີທັງໝົດ 51 ລ້ານກວ່າລິດ ຄ່າພາສີອາກອນ 106 ຕື້ກວ່າກີບ​ ສ່ວນ 8 ເດືອນປີ 2019 ການນໍາເຂົ້າ 43 ລ້ານກວ່າລິດ ຄ່າພາສີອາກອນ 90 ຕື້ກວ່າກີບ ພາຫະນະການນຳເຂົ້າ ບໍລິສັດ ລາວທານີ 8 ເດືອນປີ 2018 ມີ 650 ຄັນ ຄ່າພາສີອາກອນ 97 ຕື້ກວ່າກີບ ສ່ວນ 8 ເດືອນປີ 2019 ນໍາເຂົ້າພຽງ 55 ຄັນ ຄ່າພາສີອາກອນ 11,7 ຕື້ກີບ ປະເພດເຄື່ອງໃຊ້ໄຟຟ້າ ໃນຂະນະທີ່ສິນຄ້ານໍາເຂົ້າເພື່ອສົ່ງອອກ (ເຄື່ອງດື່ມຊູກຳລັງ) ຍ້າຍໄປນຳເຂົ້າທີ່ດ່ານພາສີສາກົນຂົວມິດຕະພາບ III ແລະ ອື່ນໆແທນ.

ຂະນະທີ່ ທ່ານ ນາງ ວົງວິໄລ ລອດປານີ ຮອງຫົວໜ້າດ່ານພາສີສາກົນປາກຊັນໄດ້ໃຫ້ຮູ້ວ່າ ອີກສາເຫດເຮັດໃຫ້ດ່ານພາສີສາກົນປາຊັນບໍ່ສາດປະຕິບັດລາຍຮັບໄດ້ຕາມແຜນການເນື່ອງຈາກດ່ານແຫ່ງນີ້ມີ 8 ຂະແໜງການເຮັດວຽກຮ່ວມກັນ ບວກກັບຈຸດທີ່ຕັ້ງຂອງດ່ານຢູ່ເທສະບານແຂວງ​ ສະພາບການອໍານວຍຄວາມສະດວກຍັງຖືກຈໍາກັດ ໂດຍສະເພາະທ່າຜູ້ໂດຍສານກັບທ່າສິນຄ້າໃຊ້ບ່ອນດຽວກັນ ສະຖານທີ່ຄັບແຄບສ່ຽງເກີດອຸບັດເຫດ ການຂົນສົ່ງສິນຄ້າໃຊ້ເຮືອບັກໃຫຍ່ເປັນພາຫະນະ ການຂົນສົ່ງສິນຄ້າຜ່ານດ່ານໃຊ້ເວລາດົນ ເດີ່ນບໍລິເວນສາງຍັງຢູ່ໃນຂັ້ນຕອນປັງປຸງ ການບໍລິການຍັງບໍ່ທັນເຂົ້າສູ່ລະບົບສາກົນແບບ CIQ ແລະ ຍັງມີຫຼາຍຂະ ແໜງການເຮັດວຽກຜ່ານຫຼາຍຂອດຂັ້ນ ການປະຕິບັດມູນຄ່າແຈ້ງຕາມຫຼັກການຊື້-ຂາຍຕົວຈິງ ພົບຄວາມຫຍຸ້ງຍາກ ການຊໍາລະສະສາງທາງດ້ານເອກະສານສຳລັບການນຳເຂົ້າສິນຄ້າເຄື່ອງຂອງໂຄງການທີ່ໄດ້ຮັບບຸລິມະສິດຍັງຊັກຊ້າບໍ່ທັນຕາມກຳນົດເວລາ.

ເຖິງແນວໃດກໍຕາມໃນ 4 ເດືອນທ້າຍປີ 2019 ຄະນະດ່ານພາສີປາກຊັນໄດ້ວາງຕົວເລກແຜນສູ້ຊົນໃຫ້ໄດ້ 170 ຕື້ກີບ ດ້ວຍການສືບຕໍ່ປະສານສົມທົບກັບກອງກວດພາສີປະຈຳແຂວງໃນການຄຸ້ມຄອງຕິດຕາມສິນຄ້ານຳເຂົ້າເພື່ອສົ່ງອອກ ສິນຄ້າຜ່ານດ່ານສາກົນ ແລະ ສິນຄ້ານຳໃຊ້ໂຄງການລົງທຶນຕ່າງໆ ຕິດຕາມການປະຕິບັດໜ້າທີ່ຂອງພະນັກງານເພື່ອຕ້ານ ແລະ ສະກັດກັ້ນປາກົດການຫຍໍ້ທໍ້ ເຂັ້ມງວດການປະຕິບັດ 10 ຂໍ້ຫ້າມ ເພີ່ມທະວີການຄຸ້ມຄອງກວດກາສິນຄ້າເຂົ້າ-ອອກດ່ານ ຄຸ້ມຄອງການເກັບລາຍຮັບເຂົ້າງົບປະມານໃຫ້ຖຶກຕ້ອງຄົບຖ້ວນ ແລະ ທັນກຳນົດເວລາ ເຂັ້ມງວດໃນການປະຕິບັດຄຳສັ່ງເລກທີ 15/ນຍ ໃຫ້ຖືກຕ້ອງຕາມກົດ ໝາຍ ລວມເຖິງເອົາໃຈໃສ່ຕ້ານ ແລະ ສະກັດກັ້ນການລັກລອບໝີພາສີທັງໃນດ່ານ ແລະ ນອກດ່ານເພື່ອບໍ່ໃຫ້ມີຊ່ອງຫວ່າງຮົ່ວໄຫຼ.

 

 

 

ໂດຍ: ອິດສະຫຼະ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.