ຊີວິດກັບມາມີຄວາມສຸກອີກຄັ້ງ ຫຼັງຈາກທີ່ທໍລະມານກັບຊີ້ນປົ່ງເກືອບ 20 ປີ

0
1023

ອິຊາຕູ ຍິງສາວຊາວເຊຍຣາລີໂອນ ໄວ 27 ປີທີ່ທົນທຸກທໍລະມານກັບຮູບລັກຂອງຕົນເອງທີ່ມີຊີ້ນປົ່ງຢູ່ບໍລິເວນເບື້ອງຂວາຂອງໃບໜ້າ ຊຶ່ງເປັນກ້ອນຊີ້ນຂະໜາດໃຫຍ່ ເຮັດໃຫ້ນາງຕ້ອງທໍລະມານ ເຈັບປວດ ແລະ ສັງຄົມເບິ່ງວ່ານາງເປັນໂຕປະຫຼາດໃນໄລຍະເວລາເກືອບ 20 ປີ ຫຼ້າສຸດ ອິຊາຕູ ກໍໄດ້ຮັບການຊ່ວຍເຫຼືອຜ່າຕັດຊີ້ນປົ່ງອອກຈາກໃບໜ້າຂອງນາງ ແລະ ເຮັດໃຫ້ຊີວິດກັບມາມີຄວາມສຸກອີກຄັ້ງ.

ເລື່ອງລາວຂອງ ອິຊາຕູ ຖືກຕີແຜ່ຜ່ານເວັບໄຊມີເຣີເມື່ອວັນທີ 12 ສິງຫາຜ່ານມາ ຊຶ່ງອາການທີ່ນາງເປັນນັ້ນເອີ້ນວ່າ Ameloblastoma  ຊຶ່ງມັນຄືຊີ້ນປົ່ງທີ່ເກີດຈາກແຂ້ວ ທັງນີ້ ອິຊາຕູ ພົບວ່າຕົນເອງມີກ້ອນຊີ້ນຢູ່ບໍລິເວນຄາງກະໄຕຕັ້ງແຕ່ອາຍຸ 10 ປີ ຊີ້ນປົ່ງກ້ອນນີ້ເຮັດໃຫ້ແຂ້ວຂອງນາງຫຼຸດອອກ ສົ່ງຜົນໃຫ້ກິນອາຫານໄດ້ລຳບາກ ເວົ້າບໍ່ຂອດ ແລະ ຫາຍໃຈບໍ່ສະດວກ.

ບັນຫາດັ່ງກ່າວສ້າງຄວາມກັງວົນໃຫ້ກັບ ອິຊາຕູ ຢ່າງຫຼວງຫຼາຍ ເນື່ອງຈາກນາງຢ້າວ່າມື້ໃດມື້ໜຶ່ງມັນຈະເຮັດໃຫ້ນາງຫາຍໃຈບໍ່ອອກຈົນເຖິງຂັ້ນເສຍຊີວິດ ຊຶ່ງໃນໄລຍະທີ່ຜ່ານມານາງກໍພະຍາຍາມຫາທາງແກ້ໄຂແຕ່ກໍເປັນເລື່ອງທີ່ຍາກລຳບາກເພາະຖານະຄອບຄົວຂອງນາງຖືວ່າຍັງທຸກຍາກ ແລະ ບໍ່ມີເງິນປິ່ນປົວພຽງພໍ.

ແຕ່ແລ້ວໂອກາດທີ່ນາງລໍຄອຍມາທັງຊີວິດກໍມາເຖິງ ໃນເດືອນກັນຍາ 2018 ອິຊາຕູ ໄດ້ຮັບຮູ້ເລື່ອງລາວຂອງ Mercy Ship ຫຼື ເຮືອແຫ່ງຄວາມເມດຕາ ຊຶ່ງເປັນອົງກອນທີ່ບໍ່ສະແຫວງຫາຜົນປະໂຫຍດ ມີເຮືອລຳໃຫຍ່ເປັນສະຖານທີ່ປິ່ນປົວເຄື່ອນທີ່ໄປທົ່ວໂລກເພື່ອປິ່ນປົວຜູ້ປ່ວຍທີ່ມີຖານະທຸກຍາກ ດັ່ງນັ້ນ ອິຊາຕູ ຈຶ່ງໄດ້ເຂົ້າໄປພົວພັນຂໍຄວາມຊ່ວຍເຫຼືອ ເພາະນີ້ຄົງເປັນໂອກາດດຽວ ແລະ ໂອກາດສຸດທ້າຍຂອງນາງທີ່ຈະໄດ້ຮັບການຊ່ວຍເຫຼືອ.

ທັງນີ້ ດຣາ ແກຣີ ປາກເກີ ຫົວໜ້າພະແນກສັນຍະກຳກະດູກຄາງກະໄຕ ແລະ ໃບໜ້າປະຈຳເຮືອ Mercy Ship Africa ໄດ້ກວດເບິ່ງອາການຂອງນາງຢ່າງລະອຽດ ແລະ ໄດ້ກ່າວວ່າ ອາການຊີ້ນປົ່ງຂອງ ອິຊາຕູ ບໍ່ແມ່ນພະຍາດມະເຮັງ ແຕ່ມັນກໍເປັນອັນຕະລາຍເຖິງຊີວິດເພາະກ້ອນຊີ້ນນີ້ມັນສົ່ງຜົນກະທົບຕໍ່ລະບົບຫາຍໃຈ ທັງນີ້ ຊີ້ນປົ່ງເທິງໃບ ໜ້າຂອງນາງມີຂະໜາດໃຫຍ່ທີມແພດສັນຍະກຳຈຶ່ງຕ້ອງໄດ້ວິເຄາະຢ່າງລະອຽດ ແລະ ລົງມະຕິວ່າຕ້ອງຜ່າຕັດທັງໝົດ 3 ຄັ້ງຄື ຜ່າຕັດເອົາຊີ້ນປົ່ງອອກ ຜ່າຕັດແກ້ໄຂກະດູກຄາງກະໄຕ ແລະ ຄັ້ງສຸດທ້າຍແມ່ນຜ່າຕັດຜິວໜັງ ແລະ ເຮັດໃຫ້ຮູບຊົງໃບໜ້າເຂົ້າທີ່.

ການຜ່າຕັດຄັ້ງທຳອິດໃຊ້ເວລາ 5 ຊົ່ວໂມງ ໂດຍທີມແພດໄດ້ໃຊ້ໝຸດໄທເທນຽມຢຶດຕິດກະດູກຄາງກະໄຕຂອງນາງໄວ້ ແລະ ໃນໄລຍະ 3 ເດືອນຕໍ່ມາ ອິຊາຕູ ກໍກັບໄປຜ່າຕັດອີກຄັ້ງ ຊຶ່ງຄັ້ງນີ້ແພດໄດ້ຕັດກະດູກຄາງກະໄຕສ່ວນໜຶ່ງຂອງນາງມາເຫຼົາ ກ່ອນຈະນຳໄປໃສ່ແທນຄາງກະໄຕທີ່ເສຍຫາຍ ແລະ ການຜ່າຕັດຄັ້ງສຸດທ້າຍກໍຜ່ານໄປເມື່ອບໍ່ດົນມານີ້ ຊຶ່ງມັນໄດ້ປ່ຽນແປງຊີວິດຂອງແມ່ຍິງຄົນນີ້ໄປຕະຫຼອດການ.

 

 

 

ຮຽບຮຽງ: ພ.ສະຫວັນ

ຮູບພາບ: kapook

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.