ຊາອຸດິດອາຣັບບີສະແດງຫຼັກຖານສິ້ນສ່ວນຊາກໂດຣນໂຈມຕີໂຮງກັ່ນນໍ້າມັນ

0
292

ກອງທັບຊາອຸດິດອາຣັບບີສະແດງຊາກໂດຣນຊຶ່ງເປັນຂີປະນາວຸດນຳວິຖີຊຶ່ງຖືກຍິງມາໂຈມຕີໂຮງກັ່ນນໍ້າມັນ 2 ແຫ່ງ ເພື່ອຫວັງພິ ສູດໃຫ້ທົ່ວໂລກເຫັນວ່າ ອີຣ່ານຄືຕົວການຂອງເຫດການຄັ້ງນີ້ ຂະນະທີ່ທາງການອີຣ່ານກໍອອກມາຢືນຢັນປະຕິເສດ ແລະ ພ້ອມໂຈມຕີກັບທັນທີຖ້າຫາກຕົນເອງຖືກໂຈມຕີ.

ສຳນັກຂ່າວຕ່າງປະເທດລາຍງານເມື່ອວັນທີ 19 ກັນຍາຜ່ານມາວ່າ ກະຊວງປ້ອງກັນປະເທດຂອງຊາອຸດິດອາຣັບບີໄດ້ນຳເສດຊາກສິ້ນສ່ວນຂອງໂດຣນ ແລະ ຂີປະນາວຸດນຳວິຖີທີ່ຖືກໃຊ້ໂຈມຕີໂຮງກັ່ນນໍ້າມັນ 2 ແຫ່ງຂອງບໍລິສັດຊາອຸດິດ ອາຣຳໂກ ເມື່ອທ້າຍອາ ທິດຜ່ານມາ ໂດຍໄດ້ນຳມາສະແດງສູ່ສາທາລະນະ ແລະ ສື່ມວນຊົນຈາກທົ່ວໂລກ ພ້ອມລະບຸວ່າ ເສດຊາກໂດຣນ ແລະ ຂີປະນາວຸດເຫຼົ່ານີ້ເປັນສິ່ງທີ່ພິສູດວ່າອີຣ່ານຢູ່ເບື້ອງຫຼັງການໂຈມຕີໂຮງກັ່ນນໍ້າມັນຍັກໃຫຍ່ຂອງຕົນເອງ ຊຶ່ງກ່ອນໜ້ານີ້ກຸ່ມກະບົດຮູຕິໃນເຢ ເມນໄດ້ອອກມາອ້າງຄວາມຮັບຜິດຊອບໃນການໂຈມຕີດັ່ງກ່າວ.

ທັງນີ້ ເຈົ້າໜ້າທີ່ກອງທັບ ແລະ ກະຊວງປ້ອງກັນປະເທດຂອງຊາອຸດິດອາຣັບບີລະບຸວ່າ ມີໂດຣນ 18 ລຳ ແລະ ຂີປະນາວຸດນຳວິຖີ 7 ລູກຖືກຍິງມາຈາກທິດທາງທີ່ບໍ່ໄດ້ມາຈາກປະເທດເຢເມນເພື່ອໂຈມຕີໂຮງກັ່ນນໍ້າມັນ 2 ແຫ່ງໃນເມືອງອັບເຄກ ແລະ ຄູຣາອິສ ໂດຍເສດຊາກສິ້ນສ່ວນຂອງໂດຣນ ແລະ ຂີປະນາວຸດດັ່ງກ່າວຕົກກະແຈກກະຈາຍທົ່ວໂຮງກັ່ນນໍ້າມັນທັງ 2 ແຫ່ງ ຈາກນັ້ນເຈົ້າ ໜ້າທີ່ກໍລວບລວມສິ້ນສ່ວນຕ່າງໆມາສະແດງຕໍ່ທີ່ສາທາລະນະ.

ຢ່າງໃດກໍຕາມ ດ້ານລັດຖະບານອີຣ່ານກໍໄດ້ປະຕິເສດມາໂດຍຕະຫຼອດວ່າ ອີຣ່ານບໍ່ໄດ້ກ່ຽວຂ້ອງກັບການໂຈມຕີໂຮງກັ່ນນໍ້າມັນທັງ 2 ແຫ່ງຂອງຊາອຸດິດອາຣັບບີ ໂດຍທາງການອີຣ່ານໄດ້ສົ່ງໜັງສືເຖິງອາເມຣິກາຜ່ານທາງສະຖານທູດສະວິດເຊີແລນວ່າ ການເຄື່ອນ ໄຫວ ໃດໆຂອງອາເມຣິກາຕໍ່ອີຣ່ານຈະຖືກຕອບໂຕ້ຢ່າງທັນທີ ຫຼັງຈາກກ່ອນໜ້ານີ້ ປະທານນາທິບໍດີ ໂດນັລ ທຣັມ ໄດ້ເຕືອນວ່າ ກອງທັບອາເມຣິກາພ້ອມໂຈມຕີຫາກມີຫຼັກຖານທີ່ຢືນຢັນວ່າອີຣ່ານກ່ຽວຂ້ອງກັບການໂຈມຕີດັ່ງກ່າວ ຊຶ່ງສົ່ງຜົນກະທົບຕໍ່ການຜະລິດນໍ້າມັນປ້ອນໃຫ້ກັບຕະຫຼາດໂລກ.

 

 

ຮຽບຮຽງ: ພ.ສະຫວັນ

ຮູບພາບ: thairath

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.