ຊາວອາເມຣິກາ 2 ຄົນຖືກຈັບໃນຈີນ.. ຂໍ້ຫາ “ຄ້າມະນຸດ”

0
455

ກະຊວງການຕ່າງປະເທດຂອງ ສປ ຈີນ ຢືນຢັນວ່າເຈົ້າໜ້າທີ່ຕຳຫຼວດໃນມົນທົນຈຽງຊູໄດ້ກັກຕົວ ແລະ ກຽມດຳເນີນຄະດີກັບຊາວອາເມຣິກາ 2 ຄົນໃນຂໍ້ຫາ “ຄ້າມະນຸດ” ຂ້າມພົມແດນ ແລະ ຢໍ້າວ່າລັດຖະບານຕາເວັນຕົກໃຫ້ຢຸດແຊກແຊງກິດຈະການພາຍໃນຂອງແຜ່ນດິນໃຫຍ່ ພາຍຫຼັງທີ່ນັກການເມືອງຄົນໜຶ່ງຂອງນ໋ອກແວສະເໜີຊື່ຊາວຮົງກົງເຂົ້າຊີງລາງວັນໂນເບລ.

ສຳນັກຂ່າວຕ່າງປະເທດລາຍງານຈາກນະຄອນປັກກິ່ງ ສປ ຈີນ ໃນວັນທີ 18 ຕຸລາ 2019 ວ່າ ໂຄສົກກະຊວງການຕ່າງປະເທດຂອງຈີນກ່າວໃນຊ່ວງໜຶ່ງຂອງການຖະແຫຼງຊຶ່ງຢືນຢັນກະແສຂ່າວເລື່ອງການຄວບຄຸມຕົວພົນລະເມືອງສັນຊາດອາເມຣິກາ ໂດຍໄດ້ເຜີຍວ່າ ເຈົ້າໜ້າທີ່ຕຳຫຼວດໃນມົນທົນຈຽງຊູທາງຕາເວັນອອກໄດ້ກັກຕົວ ນາງ ເອລິສຊາ ພີເຕີເຊັນ ເມື່ອວັນທີ 27 ກັນຍາ ແລະ ທ້າວ ຈາຄ໊ອບ ຮາຣລັນ ເມື່ອວັນທີ 29 ກັນຍາທີ່ຜ່ານມາ ຫຼັງຈາກນີ້ຈະມີການດຳເນີນຄະດີກັບທັງສອງຄົນໃນຂໍ້ຫາຄ້າມະນຸດຂ້າມພົມແດນ ຊຶ່ງບົດລົງໂທດຂັ້ນຕໍ່າສຸດກໍຄືການຮັບໂທດຕິດຄຸກ 2 ປີ ແຕ່ອາດເພີ່ມເປັນບົດລົງໂທດຕິດຄຸກຕະຫຼອດຊີວິດກໍເປັນໄປໄດ້ຊຶ່ງກໍຂຶ້ນກັບບາງກໍລະນີ.

ທັງນີ້ ໂຄສົກກະຊວງການຕ່າງປະເທດຈີນກ່າວຕື່ມວ່າ ພື້ນທີ່ເກີດເຫດຢູ່ພາຍໃຕ້ການດູແລຂອງສະຖານກົງສຸນໃຫຍ່ອາເມຣິກາໃນນະຄອນຊຽງໄຮ້ ຊຶ່ງລັດຖະບານປັກກິ່ງໄດ້ແຈ້ງເລື່ອງໄປໃຫ້ພາກສ່ວນກ່ຽວຂ້ອງຮັບຮູ້ແລ້ວ ແລະ ອີກຝ່າຍໄດ້ຈັດສົ່ງເຈົ້າໜ້າທີ່ການ ທູດເຂົ້າໄປຢ້ຽມຢາມ ແລະ ຫາລືກ່ຽວກັບເລື່ອງການປົກປ້ອງສິດທິມະນຸດ ແລະ ຜົນປະໂຫຍດຂອງຜູ້ຕ້ອງຫາທັງສອງຄົນຕາມຫຼັກ ການສາກົນ ຊຶ່ງໃນເວລາຕໍ່ມາລັດຖະບານປັກກິ່ງໄດ້ເປີດເຜີຍວ່າທັງສອງຄົນໄດ້ຮັບການປະກັນຕົວໄປແລ້ວ.

ຂະນະທີ່ສະຖານເອກອັົກຄະຣາຊະທູດອາເມຣິກາປະຈຳປັກກິ່ງໄດ້ສະແດງທ່າທີພຽງແຕ່ຮັບຮູ້ ເລື່ອງລາວດັ່ງກ່າວເທົ່ານັ້ນ ສ່ວນສຳນັກ ງານຕຳຫຼວດມົນທົນຈຽງຊູຍັງປະຕິເສດໃຫ້ຂໍ້ມູນເພີ່ມເຕີມ ຢ່າງໃດກໍຕາມ ບໍລິສັດໄຊນາ ຮໍໄຣຊອນສ ຊຶ່ງມີສຳນັກງານຢູ່ທີ່ເມືອງເຣັກຊເບີຣກໃນລັດໄອດາໂຮທາງຕາເວັນຕົກສຽງເໜືອຂອງອາເມຣິກາ ແລະ ເປັນຜູ້ປະກອບການດ້ານໂຮງຮຽນສອນພາສາອັງກິດກັບຄູ່ສັນຍາໃນຈີນໄດ້ເປີດເຜີຍເພີ່ມເຕີມວ່າ ເຈົ້າໜ້າທີ່ເຂົ້າມາຈັບ ຮາຣລັນ ພ້ອມລູກສາວຄື ເວຣາ ອາຍຸ 8 ປີຢູ່ຫ້ອງພັກໃນໂຮງ ແຮມ ຈາກນັ້ນປະມານ 48 ຊົ່ວໂມງກໍອະນຸຍາດໃຫ້ເດັກຍິງໂທລະສັບກັບໄປຫາແມ່ທີ່ລັດຢູທາ ແຕ່ຫ້າມບອກວ່າເກີດຫຍັງຂຶ້ນ? ກ່ອນຈະສົ່ງຕົວເດັກຍິງກັບອາເມຣິກາກັບເພື່ອຂອງຮາຣລັນ ສ່ວນສະຖານະຂອງ ພີເຕີຣເຊັນ ກໍໄດ້ຮັບການຢືນຢັນພຽງວ່າຍັງ “ສະບາຍດີ”.

ຢ່າງໃດກໍຕາມ ນອກຈາກປະເດັນການຢືນຢັນການກັກຕົວຊາວອາເມຣິກາທັງສອງຄົນແລ້ວ ໂຄສົກກະຊວງການຕ່າງປະເທດຂອງຈີນຍັງກ່າວຢໍ້າໃຫ້ລັດຖະບານຕາເວັນຕົກຍຸຕິການແຊກແຊງກິດຈະການພາຍໃນຂອງແຜ່ນດິນໃຫຍ່ ພາຍຫຼັງທີ່ມີລາຍງານວ່າ ນາງ ກູຣີ ເມລບີ ສະມາຊິກສະພານິຕິບັດຢັດຂອງນ໋ອກແວສະເໜີຊື່ຊາວຮົງກົງໃຫ້ເຂົ້າຊີງລາງວັນໂນເບລສາຂາສັນຕິພາບໃນປີ 2020.

 

 

 

 

ຮຽບຮຽງ: ເພັງສະຫວັນ

ຮູບພາບ: dailynews

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.