ຊາວຫວຽດນາມທະຍອຍນຳສົບໃນລົດບັນທຸກຢູ່ອັງກິດກັບບ້ານເກີດແລ້ວ!!

0
11915

ລັດຖະບານຫວຽດນາມລຳລຽງຮ່າງຜູ້ເສຍຊີວິດຈຳນວນ 16 ສົບທຳອິດຈາກທັງໝົດ 39 ສົບຊຶ່ງພົບໃນຕູ້ແຊ່ແຂງໃນລົດບັນທຸກທີ່ນິຄົມອຸດສາຫະກຳແຫ່ງໜຶ່ງໃນອັງກິດເມື່ອຕົ້ນເດືອນຕຸລາຜ່ານມາກັບເຖິງບ້ານເກີດເມືອງນອນແລ້ວ.

ສຳນັກຂ່າວຕ່າງປະເທດລາຍງານຈາກນະຄອນຮ່າໂນຍ ປະເທດຫວຽດນາມໂດຍອ້າງການລາຍງານຂອງເວັບໄຊຂ່າວອອນລາຍ ວີເອັນ ເອັກເພຣສ ວ່າ: ເຮືອບິນໂດຍສານຂອງຫວຽດນາມ ແອຣລາຍ ຊຶ່ງເປັນສາຍການບິນແຫ່ງຊາດທີ່ເດີນທາງຈາກນະຄອນລອນດອນ ເຖິງສະໜາມບິນນາໆຊາດໂໜ່ຍບ່າຍ ນະຄອນຮ່າໂນຍໂດຍໄດ້ຂົນສົ່ງໂລງສົບຈຳນວນ 16 ໂລງມານຳ, ໂດຍຜູ້ເສຍຊີວິດກຸ່ມດັ່ງກ່າວເປັນຊຸດທຳອິດຈາກທັງໝົດ 39 ສົບ.

ຂະນະທີ່ແຫຼ່ງຂ່າວຂອງລັດຖະບານຫວຽດນາມໄດ້ເປີດເຜີຍວ່າ: ການລຳລຽງຮ່າງຜູ້ເສຍຊີວິດທີ່ຍັງເຫຼືອອີກ 23 ສົບກັບປະເທດຈະມີໄວທີ່ສຸດ, ເຖິງແມ່ນວ່າເຈົ້າໜ້າທີ່ຈະຍັງບໍ່ໄດ້ລະບຸກຳນົດການທີ່ຊັດເຈນກໍຕາມ ແຕ່ກໍໄດ້ໃຫ້ຂໍ້ມູນວ່າຜູ້ເສຍຊີວິດສ່ວນໃຫຍ່ມີພູມລຳເນົາຢູ່ໃນແຂວງເຫງາະອານ, ແຂວງຫ່າຕິນ ແລະ ແຂວງກວ໋າງບິນ ຊຶ່ງຕັ້ງຢູ່ໃນເຂດພາກກາງສ່ວນເທິງຂອງຫວຽດນາມ.

ທັງນີ້, ຈາກຈຳນວນຜູ້ເສຍຊີວິດທັງໝົດແບ່ງອອກເປັນເພດຊາຍ 31 ລາຍ, ຍິງ 8 ລາຍ, ອາຍຸຕໍ່າສຸດແມ່ນ 15 ປີ ແລະ ສູງສຸດແມ່ນ 44 ປີ, ຂະນະທີ່ກະຊວງການຕ່າງປະເທດຂອງຫວຽດນາມໄດ້ອອກຖະແຫຼງການວ່າ: ການດຳເນີນການນຳສົບຜູ້ເສຍຊີວິດກັບປະເທດແມ່ນຕ້ອງມີຄ່າໃຊ້ຈ່າຍປະມານ 2.208 ປອນຕໍ່ຄົນ, ຊຶ່ງລັດຖະບານຮ່າໂນຍຈະຈ່າຍໃຫ້ກ່ອນ ຫຼັງຈາກນັ້ນຄອບຄົວຂອງຜູ້ເສຍຊີວິດແຕ່ລະລາຍແມ່ນເຮັດບົດບັນທຶກເພື່ອໃຊ້ເງິນຄືນພາຍຫຼັງ, ໂດຍເລືອກໄດ້ລະຫວ່າງການຊຳລະຄືນໃນຄັ້ງດຽວ ຫຼື ຈະຜ່ອນຊຳລະເປັນງວດ.

ສ່ວນອັງກິດຍັງຄົງດຳເນີນການສືບສວນ-ສອບສວນຂະຫຍາຍຜົນຈາກການເສຍຊີວິດຂອງຊາວຫວຽດນາມທັງ 39 ລາຍ, ໂດຍມີການສົມມຸດວ່າເຊື່ອມໂຍງກັບເຄືອຂ່າຍການຄ້າມະນຸດຂ້າມຊາດ, ຊຶ່ງເຈົ້າໜ້າທີ່ໄດ້ກັກຕົວຜູ້ຕ້ອງສົງໃສໄດ້ແລ້ວ 13 ຄົນ. ສາ ມາດຕິດຕາມອ່ານຂ່າວທີ່ກ່ຽວຂ້ອງກ່ອນໜ້ານີ້ໄດ້ທີ່ https://bit.ly/2OHbl7m

 

ຮຽບຮຽງ: ເພັງສະຫວັນ

ຮູບພາບ: dailynews

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.