ຊາຍໄວ 61​ປີເສຍຊີວິດຈາກພະຍາດປອດບວມອັກເສບລະບາດໃນ ສປ ຈີນ…!!

0
134

ທາງການເມືອງອູ່ຮັນຂອງ ສປ ຈີນໄດ້ອອກມາປະກາດເມື່ອວັນທີ 12 ມັງກອນຜ່ານມາວ່າ: ພົບຜູ້ເສຍຊີວິດຈາກພະຍາດປອດບວ ມອັກເສບປິດສະໜາເປັນລາຍທຳອິດ, ເພດຊາຍ ອາຍຸ 61 ປີ. ຂະນະທີ່ອົງການອະນາໄມໂລກໄດ້ຕັ້ງຂໍ້ສັນນິຖານວ່າ: ພະຍາດດັ່ງກ່າວອາດມີສາເຫດຈາກເຊື້ອໄສຣັສໂຄໂຣນ່າສາຍພັນໃໝ່.

ສຳນັກຂ່າວຕ່່າງປະເທດລາຍງານວ່າ: ຄະນະກຳມະການສາທາລະນະສຸກແຫ່ງເທສະບານເມືອງອູ່ຮັນໃນມົນທົນເຫີເປີ່ຍທາງພາກກາງຂອງ ສປ ຈີນ ໄດ້ອອຖະແຫຼງການເລື່ອງການພົບຜູ້ປ່ວຍເສຍຊີວິດລາຍທຳອິດຈາກການເຈັບປ່ວຍເປັນພະຍາດປອດບວມອັກເສບປິດສະໜາ, ຜູ້ກ່ຽວເສຍຊີວິດດ້ວຍອາການຫົວໃຈຫຼົ້ມແຫຼວຊຶ່ງຜູ້ກ່ຽວມີພະຍາດປະຈຳຕົວຄື: ມະເຮັງໃນຊ່ອງທ້ອງ ແລະ ພະຍາດຕັບອັກເສບ. ຂະນະດຽວກັນຜູ້ກ່ຽວກໍມີປະຫວັດວ່າເປັນລູກຄ້າປະຈຳຂອງຕະຫຼາດຈຳໜ່າຍອາຫານທະເລແຫ່ງໜຶ່ງໃນເມືອງດັ່ງກ່າວ, ຊຶ່ງມີການສັນນິຖານວ່າເປັນສາເຫດການແຜ່ລະບາດຂອງເຊື້ອພະຍາດ.

ທັງນີ້ ຈຳນວນໂຕເລກຜູ້ປ່ວຍສະສົມຢ່າງເປັນທາງການຢູ່ທີ່ 41 ຄົນ (ເປັນຢ່າງໜ້ອຍ) ໃນຈຳນວນນີ້ 12 ຄົນໄດ້ຮັບອະນຸຍາດໃຫ້ອອກຈາກການຖືກກັບບໍລິເວນແລ້ວເນື່ອງຈາກມີອາການດີຂຶ້ນ ແລະ ເດີນທາງກັບໄປພັກຟື້ນໄດ້ທີ່ບ້ານຂອງຕົນ, ຂະນະທີ່ປະຊາ ຊົນ​ 739 ຄົນຊຶ່ງອາດຢູ່ໃກ້ຊິດກັບຜູ້ປ່ວຍໂດຍເຈົ້າໜ້າທີ່ສາທາລະນະສຸກໄດ້ເອີ້ນຕົວມາກວດເຊັກຮ່າງກາຍ ແລະ ອະນຸຍາດໃຫ້ກັບບ້ານໄດ້ທັງໝົດ. ມາຮອດປັດຈຸບັນຍັງບໍ່ມີລາຍງານວ່າພົບຜູ້ປ່ວຍ ຫຼື ຜູ້ເສຍຊີວິດເພີ່ມ.

ສ່ວນອົງການອະນາໄມໂລກກໍໄດ້ອອກຖະແຫຼງກນວ່າ: ມີຄວາມເປັນໄປໄດ້ທີ່ພະຍາດປອດບວມອັກເສບປິດສະໜາແຜ່ລະບາດໃນເມືອງອູ່ຮັນອາດເປັນເຊື້ອໄວຣັນໂຄໂຣນ່າສາຍພັນໃໝ່ຊຶ່ງອີງຕາມຂໍ້ມູນຈາກການລາຍງານເບື້ອງຕົ້ນທາງລັດຖະບານປັກກິ່ງທີ່ລະບຸວ່າ: ບໍ່ແມ່ນໄຂ້ຫວັນໃຫຍ່, ບໍ່ແມ່ນໄຂ້ຫວັດນົກ ແລະ ບໍ່ແມ່ນເຊື້ອໄວຣັສອະດີໂນ.

ຢ່າງໃດກໍຕາມ ການແຜ່ລະບາດຂອງໄວຣັສເມີຣສສາມາດເກີດຂຶ້ນໄດ້ເປັນໄລຍະໆບໍ່ວ່າຈະເປັນການແຜ່ລະບາດຂອງພະຍາດຊາຣສເມື່ອປີ 2002 ແລະ ພະຍາດເມີຣສທີ່ແຜ່ລະບາຢ່າງໜັກໃນຕາເວັນອອກກາງເມື່ອປີ 2012 ຊຶ່ງປະເພດຫຼັງໄດ້ການຢືນຢັນວ່າເປັນກຸ່ມອາການຕິດຕໍ່ຢ່າງຮຸນແຮງໃນລະບົບທາງເດີນຫາຍໃຈຈາກເຊື້ອໄວຣັສໂຄໂຣນ່າສາຍພັນໃໝ່, ເຖິງແມ່ນວ່າອົງການອະນາໄມໂລກຈະຍັງເຊື່ອໝັ້ນວ່າໄວຣັສທີ່ກຳລັງແຜ່ລະບາດໃນເຂດເມືອງດັ່ງກ່າວບໍ່ໜ້າຈະຕິດຕໍ່ຈາກຄົນສູ່ຄົນໄດ້ງ່າຍ, ແຕ່ກໍຕ້ອງມີການກວດສອບຢ່າງລະອຽດຕໍ່ໄປ.

 

ຮຽບຮຽງ: ເພັງສະຫວັນ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.