ຈຸດກຳເນີດຂອງການເຮັດບຸນກະຖິນ ແລະ ອະນິສົງທີ່ໄດ້ຈາກການຖວາຍກະຖິນ

0
93

ຫຼັງຈາກບຸນອອກພັນສາແລ້ວໄປອີກໜຶ່ງເດືອນຄືນັບແຕ່ແຮມ 1 ຄ່ຳເດືອນ 11 ຫາເດືອນ 12 ເພັງ, ເປັນໄລຍະບຸນກະຖິນທີ່ເປັນຮີດໜຶ່ງໃນຮອບ 12 ເດືອນຄູ່ກັບບຸນນະມັສການພຣະທາດຫຼວງວຽງຈັນ, ບຸນກະຖິນຈັດເປັນກາລະທານ ເພາະມີຂອບເຂດຈຳກັດ ພຽງໜຶ່ງເດືອນ ຖ້າຜູ້ມີສັດທາຢາກຕັ້ງກອງບຸນໃນຮູບແບບນີ້. ນອກຈາກນີ້ ເພິ່ນມັກເອີ້ນວ່າບຸນກອງອັດຖະແທນ, ບຸນກະຖິນສ່ວນຫຼາຍນິຍົມຕັ້ງໃນໄລຍະເດືອນ 12 ຂ້າງຂື້ນ ແລະ ສ່ວນຫຼາຍຈັດເປັນບຸນມະຫາກະຖິນ ເພາະມີເວລາໃຫ້ຈັດກະກຽມ, ບໍລິວານກະຖິນໄດ້ຫຼາຍກວ່າ ສ່ວນຈຸລກະຖິນນັ້ນບໍ່ຄ່ອຍນິຍົມໃນບ້ານເຮົາ.

ມູນເຫດແຫ່ງການເຮັດບຸນກະຖິນແມ່ນມີຕົ້ນເຫດມາຈາກພິກຂຸຊາວເມືອງປາວາ ຈຳນວນ 30 ອົງປະສົງຈະໄປໄຫວ້ພຣະພຸດທະ ເຈົ້າທີ່ພຣະເຊຕະວັນ ແຕ່ໄປບໍ່ທັນວັນເຂົ້າພັນສາຈຶ່ງພາກັນຈຳພັນສາທີ່ເມືອງສາເກດ, ພໍອອກພັນສາແລ້ວກໍພາກັນໄປເຂົ້າເຝົ້າ ຢ່າງຕາກແດດ, ຕາກລົມໄປດ້ວຍຄວາມລຳບາກ ເຮັດໃຫ້ຜ້າຈີວອນເປີະເປື້ອນ ແລະ ປຽກຊຸ່ມໄປດ້ວຍນໍ້າຝົນ ຈົນເຖິງວັດພຣະເຊຕະວັນ ພຣະອົງຊົງຊາບຄວາມລຳບາກຂອງພິກຂຸເຫຼົ່ານັ້ນ ຈຶ່ງຖືເອົາເລື່ອງນີ້ເປັນຕົ້ນເຫດ ຊົງອະນຸຍາດໃຫ້ພິກຜູ້ຈຳພັນສາຄົບ 3 ເດືອນແລ້ວກຣານກະຖິນໄດ້ ເພື່ອຂະຫຍາຍເຂດເຮັດຈີວອນໃຫ້ຍາວອອກໄປອີກ 1 ເດືອນ.

ພຣະສົງຜູ້ຄວນຮັບກຣານກະຖິນ ໃນວິນັຍ ໄດ້ກຳໜົດໄວ້ວ່າພຣະສົງ ຜູ້ທີ່ເໝາະສົມໃນການຮັບກະຖິນ ຕ້ອງຢູ່ຈຳພັນສາຄົບ 3 ເດືອນ ແລະ ມີພຣະສົງຈຳພັນສາໃນວັດນັ້ນຢ່າງນ້ອຍ 5 ອົງຂຶ້ນໄປຕ່ຳກວ່ານັ້ນໃຊ້ບໍ່ໄດ້ ຄືບໍ່ໄດ້ອານິສົງກະຖິນທັງຜູ້ຮັບ ແລະ ຜູ້ອະນຸໂມທະນາ ສ່ວນການໃຫ້ຜ້ກະຖິນນັ້ນໃນອັຕຖະກະຖາມະຫາວັກອະທິບາຍວ່າ: ຜ້າກະຖິນນັ້ນສົມຄວນໃຫ້ແກ່ພຣະພິກຂຸຜູ້ມີຜ້າຈີວອນອັນເກົ່າ ຖ້າຫຼາຍອົງໃຫ້ສົມຄວນແກ່ຜູ້ມີພັນສາຫຼາຍ ຖ້າມີພັນສາຫຼາຍດ້ວຍກັນຫຼາຍອົງກໍໃຫ້ຜູ້ທີ່ເປັນມະຫາບູລຸດ ຫຼື ຜູ້ທີ່ສົມຄວນຍົກຍ້ອງ ເປັນຜູ້ມີຂໍ້ວັດປະຕິບັດງົດງາມ ຜ່ອນລົງມາ ສຸດແລ້ວແຕ່ຈະຕົກລົງກັນ ຈະເປັນເຈົ້າອາວາດ ຫຼື ພຣະເຖຣະທີ່ຄວນຍົກຍ້ອງນັບຖື ນັບວ່າໄດ້ປະຕິບັດຕາມຄອງແຫ່ງອັຕຖະກະຖາຈານແລ້ວ.

ອານິສົງຄືຜົນທີ່ໄດ້ຈາກການຖວາຍກະຖິນນັ້ນ ດັ່ງທີ່ກ່າວມາແລ້ວການຖວາຍຜ້າກະຖິນນັ້ນເປັນການເຮັດບຸນຕາມການ, ມີຂອບ ເຂດໜຶ່ງປີມີເວລາພຽງໜຶ່ງເດືອນ, ຜູ້ເປັນເຈົ້າພາບເຈົ້າສັດທາຍ່ອມໄດ້ອານິສົງ 5 ປະການຄື: 1. ເປັນທີ່ຮັກ ແລະ ຖືກໃຈຂອງຄົນທັງຫຼາຍ, 2. ມີກຽດຕິຍົດຊື່ສຽງໂດ່ງດັງໄປທົ່ວສາລະທິດ, 3. ເປັນຜູ້ແກ້ວກ້າອາດຫານບໍສະທົກສະທ້ານເມື່ອໄປສູ່ສະມາຄົມນ້ອຍໃຫຍ່, 4. ບໍ່ຫຼົງຕາຍຄືເມື່ອຄວາມຕາຍມາເຖິງກໍ່ຕາຍຢ່າງມີສະຕິ ແລະ 5. ເມື່ອຕາຍແລ້ວຍ່ອມໄປສູ່ສຸຄະຕິໂລກສະຫວັນ ໂດຍລວມຜູ້ທີ່ເປັນເຈົ້າພາບຖວາຍຍຜ້າກະຖິນນັ້ນນັບວ່າໄດ້ບຳເພັນບຸນກິຣິຍາວັດຖຸ 10 ປະການ ມີການໃຫ້ທານເປັນຕົ້ນ ແລະ ກະທໍາຄວາມເຫັນໃຫ້ກົງເປັນທີ່ສຸດ.

 

ຮຽບຮຽງໂດຍ: ພຸດສະດີ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.