ຈີນ-ຣັດເຊຍມອບລົດໄຟໃໝ່ໃຫ້ກຸຍບາ

0
233

ສຳນັກຂ່າວຕ່າງປະເທດລາຍງານເມື່ອບໍ່ດົນມານີ້ວ່າ ກຸຍບາໄດ້ລົດໄຟໂດຍສານຂະບວນໃໝ່ເປັນຄັ້ງທຳອິດ ໂດຍຫົວລົດຈັກ ແລະ ຕູ້ໂດຍສານປັບອາກາດແບບໃໝ່ນີ້ຖືເປັນການອັບເກຣດລະບົບໂດຍສານທາງລາງຂອງກຸຍບາໃນຮອບກວ່າ 4 ທົດສະວັດ ໂດຍຂະ ບວນລົດໄຟລຸ້ນໃໝ່ນີ້ໄດ້ຮັບການສະໜັບສະໜູນ ແລະ ຊ່ວຍເຫຼືອຈາກລັດຖະບານແຫ່ງ ສປ ຈີນ ແລະ ຣັດເຊຍ.

ທັງນີ້ ລະບົບຂົນສົ່ງທາງລາງຂອງກຸຍບາຖືວ່າເປັນລະບົບລົດໄຟທີ່ເກົ່າແກ່ທີ່ສຸດປະເທດໜຶ່ງໃນໂລກ ກຸຍບາມີລົດໄຟສາຍທຳອິດເມື່ອປີ 1830 ແຕ່ຫຼັງຈາກນັ້ນລະບົບການຂົນສົ່ງທາງລົດໄຟຂອງກຸຍບາກໍຊຸດໂຊມລົງເນື່ອງຈາກຄວາມວຸ້ນວາຍທາງການເມືອງ ປະ ກອບກັບຖືກອາເມຣິກາຂວ້ຳບາດຈຶ່ງບໍ່ສາມາດຫາຊື້ລົດໄຟມືສອງ ຫຼື ອຸປະກອນສະໜັບສະໜູນຕ່າງໆເພື່ອທົດແທນລະບົບລົດໄຟເກົ່າທີ່ເປ່ເພເປັນປະຈຳຈາກຊາດອື່ນໄດ້ ແຕ່ພາຍຫຼັງຍຸກຄະນະບໍລິຫານຂອງລັດຖະບານ ໂອບາມາ ໄດ້ມີການຜ່ອນຜັນການຂວ້ຳບາດ ແລະ ກັບມາສານສຳພັນກັບກຸຍບາໃໝ່ອີກຄັ້ງ.

ການມາເຖິງຂອງລົດໄຟຊຸດທຳອິດຈຳນວນ 80 ຕູ້ຈາກທັງໝົດ 4 ຊຸດທີ່ຜະລິດໂດຍຈີນແມ່ນຈະເລີ່ມໃຫ້ບໍລິການປະຊາຊົນໃນນະຄອນຮາວານ່າ ໂດຍການອັບເກຣດລະບົບລົດໄຟຄັ້ງນີ້ຄາດວ່າຈະຊ່ວຍໃຫ້ການເດີນທາງຈາກເມືອງກວນຕານາໂມໄປຍັງນະຄອນຮາວານ່າໃນໄລຍະທາງ 915 ກີໂລແມັດໃຊ້ເວລາພຽງ 15 ຊົ່ວໂມງຈາກທີ່ເຄີຍໃຊ້ເວລາເດີນທາງກວ່າ 1 ວັນ.

ນອກຈາກນີ້ ຈີນຍັງກຳນົດການຈະສົ່ງມອບລົດໄຟ 160 ຕູ້ໃຫ້ກຸຍບາອີກພາຍໃນປີ 2021 ລວມເຖິງຫົວລົດຈັກໃໝ່ອີກຈຳນວນໜຶ່ງ ອີກທັງລັດຖະບານກຸຍບາກໍພວມວາງແຜນຍົກເຄື່ອງລະບົບຂົນສົ່ງທັງໝົດໃຫ້ສຳເລັດພາຍໃນປີ 2030 ຂະນະທີ່ລັດຖະມົນຕີກະຊວງຄົມມະນາຄົມຂອງກຸຍບາໄດ້ເປີດເຜີຍວ່າ ກຸຍບາບໍ່ໄດ້ປັບປຸງລະບົບລົດໄຟໃໝ່ມາແຕ່ປີ 1970 ຊຶ່ງນອກຈາກຂະບວນລົດ ໄຟລຸ້ນໃໝ່ທີ່ໄດ້ຮັບຈາກຈີນແລ້ວ ກຸຍບາຍັງໄດ້ລົງນາມໃນຂໍ້ຕົກລົງມູນຄ່າເກືອບ 1 ພັນລ້ານໂດລາກັບຣັດເຊຍເພື່ອປັບປຸງທາງລົດໄຟໃຫ້ທັນສະໄໝຂຶ້ນ ແຕ່ຍັງບໍ່ມີການເປີດເຜີຍກ່ຽວກັບລາຍລະອຽດຕ່າງໆ.

 

 

ຮຽບຮຽງ: ສະຫະລັດ ວອນທິວົງໄຊ

ຮູບພາບ: posttoday

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.