ຈະເປັນແນວໃດເມື່ອນັກວິທະຍາສາດທົດລອງປູກຊີ້ນ “Frankenstein” ໃນອະວະກາດ

0
251

ປັດຈຸບັນ ມີນັກວິທະຍາສາດຈາກຫຼາຍຂະແໜງການກຳລັງຄົ້ນຫາວິທີການດຳລົງຊີວິດຢູ່ເທິງອະວະກາດ ບາງຄົນກໍສຸມໃສ່ການຜະລິດຊີ້ນເພື່ອເປັນອາຫານສຳຮອງສຳລັບການດຳລົງຊີວິດຫາກຕ້ອງໄປໃຊ້ຊີວິດຢູ່ເທິງອະວະກາດໃນອະນາຄົດ.

ໂດຍນັກວິທະຍາສາດຂອງປະເທດອິດສະຣາແອນ ແລະ ຣັດເຊຍ ໄດ້ລ້ຽງຊີ້ນງົວນ້ອຍໆຈາກຈຸລັງລຳຕົ້ນໃນຂະນະທີ່ຢູ່ເທິງສະຖານີອະວະກາດນານາຊາດ ຊຶ່ງຢູ່ໃນລະດັບສູງກວ່າ ໜ້າດິນໂລກປະມານ 399 ກີໂລແມັດ ທັງນີ້ ຈຸລັງງົວໄດ້ຖືກນຳມາຈາກໂລກ ແລະຖືກນຳໄປຍັງສະຖານີອະວະກາດ ແລະ ເຕີບໃຫຍ່ເປັນກ້ອນຊີ້ນຂະໜາດໃຫຍ່ຂຶ້ນເລື້ອຍໆ.

ການທົດລອງດັ່ງກ່າວແມ່ນດຳເນີນການໂດຍ Aleph Farms ຊຶ່ງເປັນບໍລິສັດອາຫານທີ່ປູກຊີ້ນງົວ-ຄວາຍ ແລະ ອື່ນໆ ການທົດ ລອງໄດ້ມີຂຶ້ນເມື່ອວັນທີ 26 ກັນຍາຜ່ານມາພາຍໃນສະຖານີອະວະກາດຣັດເຊຍ ທັງນີ້ ນັກຄົ້ນຄວ້າກ່າວວ່າ ໂຄງການດັ່ງກ່າວໄດ້ຖືກປະຕິບັດເພື່ອສະແດງວິທີການນຳຊີ້ນທີ່ປູກໃນຫ້ອງທົດລອງໃຫ້ສາມາດປູກໄດ້ໃນສະພາບທີ່ຫຍຸ້ງຍາກ ແລະ ຂາດແຄນອຸປະກອນຕ່າງໆ ໂດຍເປັນການຮ່ວມພັດທະນາດ້ານເຕັກນິກກັບບໍລິ ສັດຣັດເຊຍ 3D Bioprinting Solutions.

ທ່ານ Didier Toubia ຜູ້ອຳນວຍການ Aleph Farms ກ່າວວ່າ “ພວກເຮົາກຳລັງພິສູດວ່າຊີ້ນທີ່ປູກໄດ້ສາມາດຜະລິດໄດ້ທຸກເວລາ ທຸກບ່ອນ ແລະ ໃນສະພາບການໃດແດ່” ພວກເຮົາມີທ່າແຮງທີ່ຈະສາມາດແກ້ໄຂບັນຫາທີ່ມີປະສິດທິພາບເພື່ອຜະລິດສະບຽງອາຫານໃຫ້ພຽງພໍກັບຈຳນວນປະຊາກອນທີ່ຕ້ອງການໃນເວລາທີ່ເກີດພາວະຂາດແຄນ ຫຼື ໃນເວລາທີ່ຈຳເປັນ.

ນັກວິທະຍາສາດໄດ້ຄິດໄລ່ຂະບວນການທຳມະຊາດຂອງການຟື້ນຟູຈຸລັງກ້າມຊີ້ນທີ່ເກີດຂຶ້ນພາຍໃນຮ່າງກາຍຂອງງົວ ຊຶ່ງມັນຮຽກ ຮ້ອງໃຫ້ມີການໃຊ້ເຄື່ອງມືພິເສດທີ່ຮູ້ຈັກກັນດີວ່າ 3D bioprinter ຊຶ່ງຕິດຢູ່ກັບຈຸລັງທີ່ມີຊີວິດເພື່ອສ້າງສິ່ງທີ່ຄ້າຍຄືກັບເນື້ອເຍື່ອທີ່ແທ້ຈິງ ຊີ້ນທີ່ປູກໃນຫ້ອງແລັບມີລົດຊາດຄ້າຍຄືກັບລົດຊາດຂອງຊີ້ນແທ້ໆ ທັງນີ້ ອຸປະສັກສຳຄັນສຳລັບການປູກຊີ້ນ “Frankenstein” ໃນອະວະກາດກໍຄື “ນໍ້າ” ຊຶ່ງຕ້ອງໃຊ້ນໍ້າປະມານ 10.000-15.000 ລິດເພື່ອຜະລິດຊີ້ນງົວໃຫ້ໄດ້ 1 ກີໂລກຣາມ.

ການທົດລອງຮ່ວມກັນນີ້ແມ່ນບາດກ້າວທຳອິດທີ່ມີຄວາມສຳຄັນເພື່ອບັນລຸວິໄສທັດຂອງພວກເຮົາ ແລະ ຮັບປະກັນຄວາມປອດໄພດ້ານສະບຽງອາຫານສຳລັບຄົນລຸ້ນຫຼັງ ລວມທັງເປັນການຊ່ວຍປົກປັກຮັກສາຊັບພະຍາກອນທຳມະຊາດເທິງໜ່ວຍໂລກໃຫ້ມີຄວາມຍືນຍົງຕະຫຼອດໄປ.

 

 

 

 

ຮຽບຮຽງ: ພ.ສະຫວັນ

ຮູບພາບ: news.com.au

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.