ງົງທັງປະເທດ? ເຈົ້າພາບມາເລເຊຍແຈ້ງລວງສູງ “Miss Tourism International Laos” ບໍ່ຜ່ານ?

0
1025

ນາງ ປາວິນາ ຍົງວົງສິດທິ (ໜິງ) ສາວງາມຈາກແຂວງໄຊຍະບູລີ ເຈົ້າຂອງຕໍາແໜ່ງ ມິສທົວລິສຊຶມ “Miss Tourism International Laos 2019” ແລະ ເປັນຕົວແທນສາວງາມທີ່ ສປປ ລາວ ສົ່ງເຂົ້າປະກວດເວທີ Miss Tourism International 2019 ທີ່ຈະຈັດຂື້ນໃນລະຫວ່າງວັນທີ 22 ຕຸລາເຖິງວັນທີ 10 ພະຈິກ 2019 ທີ່ປະເທດມາເລເຊຍ.

ເມື່ອວັນທີ 22 ຕຸລາຜ່ານມາ ນາງ ປາວິນາ ຍົງວົງສິດທິ (ໜິງ) ພ້ອມກັບທີມງານກອງປະກວດກໍໄດ້ເດີນທາງໄປປະເທດມາເລເຊຍ ເພື່ອເຂົ້າຮ່ວມກັບຕົວນາງງາມ, ແຕ່ຫຼັງຈາກນັ້ນ (ວັນທີ 29 ຕຸລາ 2019) ນາງ ປາວິນາ (ໜິງ) ກໍເດີນທາງກັບຄືນມາທີ່ປະເທດລາວ ໂດຍມີທີມງານ, ເອື້ອຍລ້ຽງ, ຄອບຄົວນ້ອງນິ່ງ ເເລະ ນັກຂ່າວບາງພາກສ່ວນໄປລໍຖ້າຕ້ອນຮັບທີ່ສະໜາມບິນສາກົນວັດໄຕ.

ຕາມທີ່ກຳລັງເປັນຂ່າວໃນໂຊຊຽວກ່ຽວກັບເຫດຜົນການຖືກສົ່ງຕົວກັບມາຂອງ ນາງ ປາວິນາ ຍົງວົງສິດທິ (ໜິງ) ວ່າ: ເປັນຍ້ອນລວງສູງບໍ່ຮອດເກນມາດຕະຖານທີ່ທາງເຈົ້າພາບກຳນົດໄວ້. ດັ່ງນັ້ນ, ນັກຂ່າວລາວໂພສຈຶ່ງໄດ້ປະສານງານຫາຝ່າຍກອງປະກວດ Miss Tourism International Laos ໂດຍມີເຈົ້າໜ້າທີ່ທ່ານໜຶ່ງ (ບໍ່ປະສົງອອກນາມ) ໄດ້ໃຫ້ຂໍ້ມູນວ່າ: ເຫດຜົນທີ່ກອງປະກວດໃຫ່ຍ (ເຈົ້າພາບ) ໃຫ້ມາເເມ່ນສ່ວນສູງບໍ່ຮອດຕາມມາດຖານ, ເເຕ່ທາງທີມງານຂອງກອງປະກວດ Miss Tourism International Laos ກໍມີການວັດແທກຢ່າງລະອຽດກ່ອນຈະສົ່ງຕົວນ້ອງໄປຮ່ວມແຂ່ງຂັນ, ຖ້າບໍ່ຮອດຕາມມາດຖານເຮົາກໍບໍ່ສົ່ງໄປ ເເຕ່ເມື່ອຄໍາສັ່ງອອກມາເເນວນັ້ນທາງເຮົາກໍເຄົາລົບການຕັດສິນ ແລະ ຕອນນີ້ທາງກອງປະກວດກໍກໍາລັງຫາຂໍ້ມູນທີ່ຊັດເຈນວ່າ ມາດຖານການວັດແທກຂອງປະເທດເຮົາ ເເລະ ປະເທດເຈົ້າພາບມີຄວາມເເຕກຕ່າງກັນເເນວໃດ? ເພື່ອທາງເຮົາຈຶ່ງໄດ້ນຳມາປັບປຸງ, ການຜິດພາດໃນຄັ້ງນີ້ກໍຖືວ່າເປັນບົດຮຽນ ເເລະ ກໍພ້ອມທີ່ຈະນໍາມາເເກ້ໄຂ ເເລະ ພັດທະນາຕໍ່ໄປໃນປີໜ້າ.

ມາດຕະຖານນາງງາມທີ່ຈະສົ່ງໄປປະກວດໃນເວທີລະດັບສາກົນສາວງາມເເຕ່ລະປະເທດຕ້ອງມີ:  ເປັນເພດຍິງໂດຍກໍາເນີດ, ໜ້າຕາທີ່ເປັນເອກະລັກ, ມີສ່ວນສູງ 167 ຊັງຕີແມັດຂື້ນໄປ, ບໍ່ເຄີຍມີປະຫວັດແຕ່ງດອງ ຫຼື ຄະດີອາຊະຍາກໍາ, ມີຄວາມພຽບພ້ອມທັງຄວາມງາມ, ຄວາມຮູ້ ແລະ ຄວາມສາມາດ.

ນາງ ປາວິນາ ຍົງວົງສິດທິ (ໜິງ) ມິສທົວລິສຊຶມ ອິນເຕີເນຊັນນໍລາວ 2019 ມີຮູບຮ່າງສັດສ່ວນ 34 25 36 ສ່ວນສູງ 168 ນໍ້າໜັກ 50 ກີໂລກຣາມ, ຈົບການສຶກສາຈາກວິທະຍາໄລຈັນສະໝຸດ ເເຂວງໄຊຍບູລີ, ສາມາດເວົ້າໄດ້ 2 ພາສາຄື: ພາສາຈີນ ແລະ ພາສາອັງກິດ. ປັດຈຸບັນ ນາງກໍາລັງດໍາເນີນທຸລະກິດຊ່ວຍຄອບຄົວ ເເລະ ລໍຖ້າເຂົ້າເຮັດວຽກໃນປີ 2020 ທີ່ຈະມາຮອດນີ້ ຄຽງຄູ່ກັບການປະຕິບັດພາລະກິດຂອງນາງງາມ, ສ່ວນທາງດ້ານຜົນງານດ້ານບັນເທິງກໍມີແນ່ນອນໃນໄວໆນີ້.

ທາງກອງປະກວດ Miss Tourism International Laos ຍັງບອກອີກວ່າ: ເລື່ອງການປະກວດຕໍ່ໃນເວທີອື່ນຂອງ ນາງ ປາວິນາ ຍົງວົງສິດທິ (ໜິງ) ນັ້ນກໍຄືເລື່ອງຂອງອະນາຄົດ ເເຕ່ທາງກອງປະກວດກໍຍັງໝັ້ນໃຈວ່າສັກກະຍາພາບຂອງນາງເເມ່ນສາມາດສານໄປຕໍ່ໄດ້ໃນເສັ້ນທາງສາຍນີ້ ເພາະນັບເເຕ່ມື້ທໍາອິດທີ່ເຫັນຈົນຮອດປັດຈຸບັນນາງກໍມີການເຝິກຝົນ, ກຽມຄວາມພ້ອມເເບບບໍ່ໄດ້ພັກເລີຍ ເເລະ ທາງກອງປະກວດຍັງຕັ້ງຄວາມຫວັງໄວ້ສະເໝີວ່າ “ມື້ໃດມື້ໜຶ່ງກໍຕ້ອງມີຈັກລາງວັນໃຫ້ເເກ່ນັກສູ້ເເບບນາງຢ່າງເເນ່ນອນ”.

ຮຽບຮຽງຂ່າວ:​ພຸດສະດີ ລາວລີ
ແຫຼ່ງຂໍ້ມູນ: ກອງປະກວດ Miss Tourism International Laos

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.