ຄົນຜິວສີທີ່ປະສົບຄວາມສຳເລັດໃນລາວກັບຄ່ານິຍົມສີຜິວຂອງຄົນໃນສັງຄົມ

0
169

ສີຜິວເປັນສິ່ງທີ່ຄົນເຮົາທຸກຄົນເກີດມາພ້ອມກັບມັນ, ເຮົາບໍ່ສາມາດເລືອກໄດ້ວ່າຈະເປັນຄົນຜິວຂາວ, ເຫຼືອງ, ສີແທນ (ຜິວສອງສີ) ຫຼື ຄົນຜິວດຳ ເນື່ອງຈາກມັນເປັນການຖ່າຍທອດທາງພັນທຸກຳຂອງແຕ່ລະຄົນ.

ສ່ວນເລື່ອງຂອງຄ່ານິຍົມມັກຜິວຂາວຂອງຄົນອາຊີນັ້ນບໍ່ແມ່ນເກີດຂຶ້ນແຕ່ກັບສະເພາະຄົນລາວເທົ່ານັ້ນ, ແມ່ນແຕ່ຄົນ ສ.ເກົາຫຼີ, ຍີ່ປຸ່ນ, ຈີນ, ໄທ ກໍເປັນຄືກັນ ຄ່າ່ນິຍົມໃນການມັກຄວາມຂາວໃສມັນເລີ່ມມີການພັດທະນາມາເລື່ອຍໆ ໂດຍຮັບອິດທິພົນມາຈາກການເບິ່ງ ແລະ ຕິດຕາມດາຣາ, ນາງແບບ-ນາຍແບບ, ສິລະປິນ-ນັກຮ້ອງ ແລະ ອື່ນໆທີ່ຕົນເອງມັກຊຶ່ງສ່ວນຫຼາຍກໍເປັນຄົນຜິວຂາວ ລວມເຖີງການໂຄສະນາປະເພດເຄື່ອງສຳອາງຕ່າງໆທີ່ມັກຈະໃຫ້ນິຍາມຄວາມງາມນັ້ນກໍຄື “ຄວາມຂາວໃສ”.

ໃນຄວາມເປັນຈິງແລ້ວຢູ່ໃນໂລກນີ້ມີຄົນຜິວສີທີ່ມີຊື່ສຽງໂດງດັງ ແລະ ເປັນບຸກຄົນທີ່ປະສົບຄວາມເລັດກໍມີຫຼາຍທ່ານເຊັ່ນ, ທ່ານ ບາຣັກ ໂອບາມາ, ບີຍອນເຊ, ຣີຮັນນ່າ, ວິວ ສະມິດ, ວິດນີ ຮຸສຕັນ, ໄຣອັນ ບາເບິລ, ຄານເຢ ເວສ ແລະ ຫຼ້າສຸດ ໃນເວທີປະ ກວດນາງງາມລະດັບໂລກກໍມີນາງງາມຜິວສີສາມາດຄວ້າຕຳແໜ່ງສູງສຸດມາຄອງນັ້ນກໍຄື: ເວທີມິສ ຢູນິເວີສ ແລະ ມິສ ເວິລ, ສ່ວນໃນປະເທດລາວເຮົາກໍມີດາຣາ, ນັກຮ້ອງທີ່ປະສົບຄວາມສຳເລັດ ແລະ ເປັນທີ່ຮູ້ຈັກໃນສັງຄົມ ຕ໋ອດ ຣີນ່າ, ເຈ້ຍ ປາຊີຟິກ ແລະ ຄົນອື່ນໆ.

ຄ່ານິຍົມເລື່ອງສີຜິວຖືວ່າມີມາແຕ່ລຸ້ນປູ່ຍ່າຕາຍາຍ, ເມື່ອຍ້ອນເວລາກັບໄປຫຼາຍຮ້ອຍປີໃນຍຸກສະໄໝກ່ອນຊາວຕາເວັນຕົກເຊື່ອວ່າຄົນຜິວຂາວເປັນເຊື້ອຊາດທີ່ສູງສົ່ງທີ່ສຸດ, ເປັນຊົນຊັ້ນທີ່ບໍ່ຕ້ອງເຮັດງານໜັກ, ບໍ່ຕ້ອງຕາກແດດຕາລົມ (ໝາຍເຖິງໃນຍຸກສະໄໝຫຼາຍຮ້ອຍປີກ່ອນ), ການຢຽດສີຜິວເກີດຂຶ້ນຍ້ອນເຫດຜົນທີ່ວ່າ: ທາດສ່ວນໃຫຍ່ທີ່ຖືກຈັບຕົວໄປໃຊ້ແຮງງານທີ່ທາງຝັ່ງຕາເວັນຕົກຈະເປັນຄົນຜິວສີທີ່ມາຈາກທາງອາຟຣິກາ ແລະ ຍ້ອນວ່າທາດຖືເປັນຊົນຊັ້ນລຸ່ມ (ໃນຍຸກນັ້ນ). ແຕ່ໃນຍຸກປັດຈຸບັນ ຄວາມຄິດຂອງຄົນຝັ່ງຕາເວັນຕົກສ່ວນໃຫຍ່ໄດ້ປ່ຽນຈາກເມື່ອກ່ອນ ເພາະເຂົາເຈົ້າເບິ່ງວ່າຄົນມີຜິວສີເປັນຄົນມີສຸຂະພາບດີ, ເປັນຄົນມີເງິນ, ເປັນຄົນມີຖານະເທົ່າທຽມກັບເຂົາເຈົ້າ.

ເມື່ອໄດ້ທຳຄວາມເຂົ້າໃຈກ່ຽວກັບເລື່ອງນີ້ເຮົາຈະເຫັນໄດ້ວ່າ: ຄ່ານິຍົມກ່ຽວກັບສີຜິວຕ່າງໆລ້ວນແຕ່ເປັນສິ່ງທີ່ມະນຸດຄິດກັນໄປເອງ, ຊຶ່ງໃນຄວາມເປັນຈິງບໍ່ວ່າຈະມີສີຜິວໃດກໍຕາມກໍບໍ່ຄວນຖືກຕັດສິນ ຫຼື ແບ່ງແຍກຈາກສັງຄົມ ເພາະສີຜິວເປັນສິ່ງທີ່ຕິດຕົວເຮົາມາຕັ້ງແຕ່ເກີດ, ສິ່ງທີ່ເປັນຕົວຊີ້ວັດຄວາມເປັນຄົນດີບໍ່ດີ, ຄົນຮັ່ງມີ ຫຼື ຄົນທຸກ, ຄົນທີ່ປະສົບຄວາມສຳເລັດ ຫຼື ຫຼົ້ມເຫຼວນັ້ນ ມັນບໍ່ໄດ້ຂຶ້ນກັບສີຜິວ!! ແຕ່ມັນຂຶ້ນກັບຕົວຂອງບຸກຄົນນັ້ນໆ ແລະ ເຮົາເອງກໍຄວນມີຄວາມພູມໃຈໃນສີຜິວຂອງຕົວເອງ ບໍ່ວ່າຈະເກີດມາມີສີຜິວແນວໃດ ຫຼື ມີສະພາບແນວໃດກໍຕາມເພາະເຮົາທຸກຄົນມີຄວາມງາມໃນແບບຂອງຕົວເອງ.

 

 

ບົດໂດຍ: ພຸດສະດີ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.