ຄະນະສະເພາະກິດແນະນຳ 7 ວິທີຄວບຄຸມການລະບາດເຊື້ອໂຄວິດ-19 ໃນລະດັບຄອບຄົວ

0
1890

ສຳນັກຂ່າວສານປະເທດລາວລາຍງານໃຫ້ຮູ້ວ່າ ໃນໂອກາດຖະແຫຼງຂ່າວໃນວັນທີ 2 ເມສາ 2020, ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ ໂຄວິດ-19, ໂດຍທ່ານ ລັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ມີຄຳແນະນຳຕື່ມກ່ຽວກັບວິທີຄວບຄຸມພະຍາດການຕິດເຊື້ອໃນລະດັບຄອບຄົວ ເພື່ອໃຫ້ມີການເອົາໃຈໃສ່ປະຕິບັດຢ່າງຈິງຈັງ, ຫຼຸດຜ່ອນຄວາມສ່ຽງຈາກພະຍາດໂຄວິດ-19. ສຳລັບວິທີຄວບຄຸມການຕິດເຊື້ອໃນລະດັບຄອບຄົວຢ່າງຈິງຈັງຄື:

  1. ອະນາໄມທຸກໆວັນ ບັນດາຈຸດ ຫຼື ພື້ນຜິວທີ່ສະມາຊິກຄອບຄົວໄດ້ຮ່ວມສໍາພັດຈັບບາຍ ດ້ວຍນໍາຢາຂ້າເຊື້ອ ຫຼື ນໍ້າສະບູ/ແຟັບ ໂດຍຮັບປະກັນຄວາມປອດໄພຕໍ່ທຸກຄົນໃນເຮືອນ;
  2. ໂຈະຊົ່ວຄາວ ການຮັບແຂກຄົນມາຢາມ ຫຼື ພີ່ນ້ອງມາພັກເຊົາ ໃນໄລຍະການລະບາດນີ້.
  3. ເຂັ້ມງວດໃນການກິນອາຫານທີ່ປຸງແຕ່ງສຸກດີ ແລະ ໃຊ້ບ່ວງກາງ ໃນການຕັກອາຫານ, ພ້ອມທັງກິນອາຫານ ແລະ ພັກຜ່ອນໃຫ້ພຽງພໍ, ສົມທົບກັບການການອອກກໍາລັງກາຍໃຫ້ສຸຂະພາບແຂງແຮງ
  4. ສະມາຊິກຄອບຄົວປະຕິບັດການຢູ່ຫ່າງກັນຢ່າງນ້ອຍ 2 ແມັດຂຶ້ນໄປ ແລະ ບໍ່ອະນຸຍາດໃຫ້ສະມາຊິກຄົນໃດ ໄປຮ່ວມສັງສັນກັບຄົນອື່ນ ສ່ຽງຕໍ່ການນໍາເຊື້ອພະຍາດກັບມາເຮືອນ.
  5. ຕິດຕາມສຸຂະພາບຂອງແຕ່ລະຄົນ, ໂດຍສະເພາະ ຖ້າສະມາຊິກຄອບຄົວຄົນໃດ ທີ່ເຂົ້າອອກເຮືອນໃນແຕ່ລະວັນ ເພາະມີຄວາມຈໍາເປັນຕ້ອງໄດ້ປະຕິບັດພາລະກິດ.
  6. ພໍ່ແມ່ ແລະ ລູກທຸກຄົນ ປະຕິບັດການໄອຈາມຢ່າງມີມາລະຍາດ, ອັດປາກເວລາໄອຈາມ ແລະ ຖິ້ມຂີ້ເຫຍື້ອ.
  7. ຕິດຕາມຂ່າວສານຈາກແຫຼ່ງຂ່າວຂອງທາງການທຸກວັນ, ໂດຍສະເພາະເຟດບຸກຂອງ ສູນຂ່າວສານ ຂໍໃຫ້ທຸກຄົນມີສະຕິໃນການບໍລິໂພກຂ່າວຈາກແຫຼ່ງຕ່າງໆ ຫຼື ຂອງບຸກຄົນ ທີ່ສ້າງຂ່າວແອບອ້າງ ສ້າງຜົນປະໂຫຍດໃຫ້ແກ່ຕົນເອງ ຫຼື ປັ່ນປ່ວນສັງຄົມ. ໃຊ້ສາຍດ່ວນຂອງກະຊວງສາທາລະນະສຸກ ໝາຍເລກ 165 ຫຼື 166 ເພື່ອສອບຖາມເພີ່ມເຕີມ.

ສໍາລັບການໄປຕະຫຼາດ ຫຼື ຮ້ານຄ້າ, ແຕ່ລະຄອບຄົວມອບໝາຍ 1 ຄົນເທົ່ານັ້ນ ເພື່ອອອກໄປຊື້ເຄື່ອງບໍລິໂພກ ແລະ ບໍ່ຄວນໃຫ້ເດັກນ້ອຍ ຫຼື ຜູ້ອາຍຸສູງໄປຕະຫຼາດ. ຜູ້ໄປຕະຫຼາດຄວນສັງເກດ ແລະ ບໍ່ເອົາຕົວເອງໄປແຍ່ງຊີງ ເພື່ອຊື້ເຄື່ອງ, ຄວນລະມັດລະວັງຄົນອື່ນ ແລະ ຢູ່ຫ່າງຈາກແມ່ຄ້າ ຢ່າງໜ້ອຍ 2 ແມັດຂຶ້ນໄປ.

 

ຮຽບຮຽງຂ່າວ: ພຸດສະດີ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.