ຄວາມຈິງຈາກປາກພໍ່ຂອງເດັກນ້ອຍ! ກັບປະເດັນຮ້ອນ “ບໍ່ຈ່າຍຄ່າຮຽນບໍ່ໄດ້ເຂົ້າຮຽນ”

0
3923

ວັນທີ 2 ກັນຍາ 2019 ເປີດສົກຮຽນວັນທຳອິດກໍມີກະແສຂ່າວດັງສະນັ່ນໄປທົ່ວໂຊຊຽວກ່ຽວກັບປະເດັນ “ບໍ່ຈ່າຍຄ່າຮຽນບໍ່ໄດ້ເຂົ້າຮຽນ” ໂດຍເລື່ອງລາວໄດ້ໂພສຜ່ານເຟສບຸກສ່ວນຕົວຂອງຜູ້ໃຊ້ເຟສບຸກຄົນໜຶ່ງ ໂດຍມີເນື້ອໃນຂຽນບັນຍາຍສະຫຼຸບໄດ້ໃຈຄວາມສັ້ນໆປະມານນີ້ “ເດັກນ້ອຍ ປໍ 5 ຄົນໜຶ່ງມາໂຮງຮຽນແຕ່ບໍ່ໄດ້ເຂົ້າຮຽນນຳໝູ່ ເນື່ອງຈາກວ່າຜູ້ປົກຄອງບໍ່ມີເງິນພຽງພໍທີ່ຈະຈ່າຍຄ່າຮຽນ ດັ່ງນັ້ນ ນາຍຄູຈຶ່ງບອກໃຫ້ກັບເມືອກ່ອນ” (ຕາມຂໍ້ຄວາມສົນທະນາໃນຮູບ).

ເລື່ອງນີ້ໄດ້ຮັບຄວາມສົນໃຈຈາກສັງຄົມຢ່າງກວ້າງຂວາງ ເພາະວ່າມັນກ່ຽວພັນກັບລະບົບການສຶກສາ ແລະ ຈັນຍາບັນຂອງໂຮງຮຽນ ແລະ ສະຖາບັນໂຮງຮຽນ ພ້ອມທັງຍັງເກີດຄຳຖາມຕ່າງໆນາໆຂຶ້ນມາຫຼາຍຄຳຖາມຈາກຄົນໃນໂລກໂຊຊຽວບໍ່ວ່າເປັນເລື່ອງນີ້ເປັນເລື່ອງແທ້ ຫຼື ບໍ່? ເປັນຫຍັງຈຶ່ງເອົາລູກມາເຂົ້າໂຮງຮຽນຢູ່ເຂດທາດຫຼວງ? ພໍ່ນາງໝູນ້ອຍເຮັດອາຊີບຫຍັງ? ເຮືອນຂອງເຂົາເຈົ້າຢູ່ເຂດທາດຫຼວງ ຫຼື ຢູ່ໜອງແຕ່ງ? ແລະ ຄວາມຄິດເຫັນອື່ນໆ ຊຶ່ງສ່ວນຫຼາຍໄປໃນທິດທາງລົບໂດຍສະເພາະແມ່ນການຕຳນິການກະ ທຳຂອງທາງພາກສ່ວນກ່ຽວຂ້ອງພາຍໃນໂຮງຮຽນດັ່ງກ່າວ.

ດັ່ງນັ້ນ ເພື່ອໃຫ້ປະເດັນນີ້ມີຄຳຕອບທີ່ຊັດເຈນ ທາງທີມງານລາວໂພສກໍໄດ້ໂທລະສັບໄປສອບຖາມເລື່ອງລາວຕ່າງໆນາໆກັບຜູ້ປົກຄອງກໍຄືພໍເດັກນ້ອຍໃນຂ່າວ ໂດຍໄດ້ຂໍ້ມູນດັ່ງນີ້

  1. ຕໍ່ກັບຄຳຖາມເລື່ອງນີ້ເປັນເລື່ອງແທ້ ຫຼື ບໍ່? “ມັນອາດເປັນເລື່ອງທີ່ເກີດຂຶ້ນແທ້ ຂໍ້ມູນທີ່ທາງເຈົ້າຂອງຮ້ານເຂົ້າຈີ່ໂພສລົງເປັນຂໍ້ມູນທີ່ໄດ້ມາຈາກການໂອ້ລົມກັບເດັກນ້ອຍ (ເດັກນ້ອຍ ປໍ 5) ຕອນທີ່ພໍ່ນາງບໍ່ຢູ່ ແລະ ຄິດວ່າທາງຮ້ານເຂົ້າຈີ່ເມື່ອຮັບຟັງເລື່ອງລາວຈາກເດັກນ້ອຍແລ້ວອາດຈະເກີດມີອາລົມບໍ່ພໍໃຈຕໍ່ການຕັດສິນໃຈຂອງທາງໂຮງຮຽນ ຈຶ່ງໄດ້ຂຽນເລົ່າລົງໃນເຟສບຸ໊ກສ່ວນຕົວ ແຕ່ອາດບໍ່ທັນໄດ້ຄຳນຶງວ່າມັນຈະກາຍເປັນເລື່ອງລາວທີ່ສັງຄົມໃຫ້ຄວາມສົນໃຈຫຼາຍປານນີ້”.

2. ເປັນຫຍັງຈຶ່ງເອົາລູກມາເຂົ້າໂຮງຮຽນຢູ່ເຂດທາດຫຼວງ? “ສຳລັບຄຳຖາມນີ້ແມ່ນທຸກຄົນເຂົ້າໃຈຜິດ ພໍ່ນາງນ້ອຍເລົ່າວ່າ ລູກສາວຂອງເພິ່ນເຂົ້າໂຮງຮຽນຢູ່ແຖວໜອງແຕ່ງບໍ່ແມ່ນຢູ່ທາດຫຼວງ ສາເຫດທີ່ພາລູກສາວມາເຂົ້າໂຮງຮຽນຢູ່ແຖວໜອງແຕ່ງເນື່ອງຈາກວ່າເປັນທາງຜ່ານທີ່ພໍ່ຕ້ອງກາຍໄປເຮັດວຽກແຕ່ລະມື້”.

3. ພໍ່ໝູນ້ອຍເຮັດອາຊີບຫຍັງ? ຢູ່ບໍລິສັດໃດ? “ພໍ່ໝູນ້ອຍເຮັດອາຊີບເປັນຊ່າງຖ່າຍຮູບຢູ່ເດີ່ນພຣະທາດຫຼວງ”.

4. ເຮືອນເຂົາເຈົ້າຢູ່ເຂດທາດຫຼວງ ຫຼື ໜອງແຕ່ງ? “ເຮືອນເຂົາເຈົ້າບໍ່ໄດ້ຢູ່ທາດຫຼວງ ແລະ ບໍ່ໄດ້ຢູ່ໜອງແຕ່ງ ແຕ່ຢູ່ບ້ານວຽງຄຳຈຳປາແຖວຕາດມູນ”.

ສຳລັບດຣາມ່າບໍ່ຈ່າຍຄ່າຮຽນບໍ່ໄດ້ເຂົ້າຮຽນນັ້ນ ເລື່ອງລາວມີຢູ່ວ່າ ໃນເຊົ້າມື້ນັ້ນ (ວັນທີ 2 ກັນຍາ 2019) ພໍ່ຂອງນາງນ້ອຍໄດ້ພາລູກສາວໄປເຂົ້າໂຮງຮຽນ ແຕ່ມື້ນັ້ນບັງເອີນຕົນເອງມີແຕ່ບາດ (ສະກຸນເງິນໄທ) ຕິດໂຕໄປ ເລີຍຢ້ານທາງໂຮງຮຽນໄລ່ອັດຕາແລກປ່ຽນໃຫ້ໃນລາຄາຕ່ຳ ດັ່ງນັ້ນ ຕົນເອງຈຶ່ງໄດ້ໃຫ້ເງິນເມຍໄປແລກປ່ຽນກ່ອນ ມື້ນັ້ນມີຄົນພາລູກໄປລົງທະບຽນຮຽນຫຼາຍຕໍ່ແຖວກັນຍາວ ຕົນເອງຈຶ່ງພາລູກສາວຂັບລົດອອກຈາກໂຮງຮຽນແລ້ວພາມາເດີ່ນພຣະທາດຫຼວງນຳຕົນເອງແທນທີ່ຈະເອົາລູກສາວໄປສົ່ງໄວ້ເຮືອນ ແຕ່ດ້ວຍຄວາມເປັນຫ່ວງເພາະລູກຍັງນ້ອຍບໍ່ຢາກໃຫ້ຢູ່ຄົນດຽວຈຶ່ງພາລູກສາວມານຳ ທຳອິດວ່າຈະເຕີມນໍ້າມັນລົດຢູ່ແຖວໜອງແຕ່ງແຕ່ຜັດລືມຍ້ອນຄິດນຳລູກສາວ ຈົນມາຮອດແຖວດົງນາໂຊກນໍ້າມັນລົດກໍໝົດກ່ອນເລີຍພາລູກຍ່າງ ລູກສາວຈົ່ມວ່າປວດຂາຕົນເອງຈຶ່ງຝາກລູກສາວໄວ້ກັບຮ້ານເຂົ້າຈີ່ກ່ອນແລ້ວຈຶ່ງຈູງລົດໄປເຕີມນໍ້າມັນ ຫຼັງຈາກເຕີມນໍ້າມັນແລ້ວກໍກັບມາຮັບລູກສາວໂດຍບໍ່ໄດ້ຄິດຫຍັງຫຼາຍ ແລະ ຫາກໍຮູ້ວ່າມັນເປັນຂ່າວດັງໃນຕອນແລງຫຼັງຈາກທີ່ກັບມາຮອດເຮືອນ ຜູ້ເປັນເມຍໄດ້ເລົ່າສູ່ຟັງ ແລະ ປັດຈຸບັນນີ້ລູກສາວໄດ້ເຂົ້າໂຮງຮຽນເປັນປົກກະຕິແລ້ວ ດັ່ງນັ້ນ ຈຶ່ງຂໍໃຫ້ທຸກຄົນຢຸດຕິໃນການໃຫ້ຄວາມສົນໃຈກ່ຽວກັບປະເດັນນີ້ ເພາະຢ້ານມີຜົນກະທົບຕໍ່ລູກສາວ ແລະ ສະຖານທີ່ສຶກສາຊຶ່ງຖືກເຊື່ອມໂຍງພາຍໃນຂ່າວ.

ຂໍ້ມູນທີ່ຂຽນຂ້າງເທິງນີ້ເປັນຂໍ້ມູນຄວາມຈິງຈາກການສຳພາດພໍ່ຂອງນາງນ້ອຍ ແຕ່ປັດຈຸບັນທາງໂຮງຮຽນຄູ່ກໍລະນີຍັງບໍ່ໄດ້ອອກມາເຄື່ອນໄຫວໃດໆ ດັ່ງນັ້ນ ເຮົາຕ້ອງຕິດຕາມກັນຕໍ່ໄປວ່າທາງໂຮງຮຽນຈະອອກມາຖະແຫຼງຂ່າວ ຫຼື ມີບົດສະຫຼຸບກ່ຽວກັບກໍລະນີດັ່ງ ກ່າວນີ້ແນວໃດ?.

ບົດໂດຍ: ບຸດສະດີ ສາຍນໍ້າມັດ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.