ກຽມເປີດໃຫ້ບໍລິການສະຖານທີ່ປ່ຽນຮ່າງຄົນຕາຍໃຫ້ເປັນປຸ໋ຍແຫ່ງທຳອິດຂອງໂລກ…!!

0
1683

ຣີຄອມໂພສ (Recompose) ສະຖານທີ່ຮັບເຮັດສົບແບບໃໝ່ຊຶ່ງໃຊ້ວິທີປ່ອຍໃຫ້ຮ່າງຂອງຄົນຕາຍຍ່ອຍສະຫຼາຍໄປເອງຕາມທຳ ມະຊາດແທນທີ່ຈະຝັງ ຫຼື ເຜົາ…!! ທັງນີ້ ລັດວໍຊິງຕັນຂອງອາເມຣິກາປະກາດກຽມເປີດໃຫ້ບໍລິການສະຖານທີ່ດັ່ງກ່າວເປັນແຫ່ງທຳອິດຂອງໂລກຊຶ່ງກົດໝາຍອະນຸຍາດໃຫ້ນຳໃຊ້ວິທີດັ່ງກ່າວໃນການກັບສົບຄົນຕາຍ.

ຂໍ້ກົດໝາຍເບື້ອງຕົ້ນຈະມີຜົນບັງຄັບໃຊ້ໃນເດືອນພຶດສະພາ 2020 ແລະ ເປີດໂອກາດໃຫ້ບໍລິສັດຂອງ ແຄັດທຣີນາ ສະເປດ ຜູ້ບໍລິຫານຣີຄອມໂພສຊຶ່ງຖືເປັນກິດຈະການເພື່ອປະໂຫຍດສາທາລະນະ, ສາມາດເລີ່ມໃຫ້ບໍລິການເຮັດສົບດ້ວຍການໝັກໃຫ້ເປັນປຸ໋ຍມະ ນຸດໄດ້ຢ່າງຖືກຕ້ອງຕາມກົດໝາຍ.

ສະຖານທີ່ຮັບເຮັດສົບແບບພິເສດນີ້ຈະຕັ້ງຢູ່ໃນນະຄອນຊີແອັດເທິລຂອງອາເມຣິກາ, ໂດຍ ຈະໃຫ້ບໍລິການໝັກບົ່ມສົບຄົນຕາຍໃຫ້ຍ່ອຍສະຫຼາຍກາຍເປັນດິນປຸ໋ຍຊັ້ນດີ, ເໝາະສຳລັບນຳໄປເຮັດສວນ ແລະ ປູກພືດ ຊຶ່ງທາງບໍລິສັດຣີຄອມໂພສເອີ້ນຂະບວນການນີ້ວ່າ: “ການປະກອບສ້າງໃໝ່” ຫຼື Recomposition ແລະ “ການຫຼຸດຮູບແບບອິນຊີຕາມທຳມະຊາດ” ຫຼື Natural organic reduction.

ທັງນີ້ ກ່ອນນຳສົບເຂົ້າເກັບໃນຊ່ອງຮູບຫົກຫຼ່ຽມທີ່ສ້າງໃຫ້ນຳກັບມາໃຊ້ໃໝ່ໄດ້ຈະມີການຖົມຮ່າງຜູ້ເສຍຊີວິດດ້ວຍເສດໄມ້ນ້ອຍໆໃນສະພາບທີ່ປ່ອຍໃຫ້ອາກາດຜ່ານໄດ້ສະດວກເພື່ອໃຫ້ ເກີດສະພາບແວດລ້ອມທີ່ເໝາະສົມກັບການເຕີບໂຕຂອງຈຸລິນຊີ ແລະ ແບັກທີເຣຍທີ່ເປັນປະໂຫຍດ.

ເມື່ອຄົບກຳນົດທີ່ຮ່າງຜູ້ເສຍຊີວິດໄດ້ຍ່ອຍສະຫຼາຍຢ່າງສົມບູນຊຶ່ງຄາດວ່າຈະໃຊ້ເວລາປະມານ 30 ມື້, ຍາດພີ່ນ້ອງກໍຈະສາມາດນຳປຸ໋ຍທັງໝົດ ຫຼື ບາງສ່ວນທີ່ໄດ້ຈາກການໝັກບົ່ມສົບໄປໃຊ້ປູກຕົ້ນໄມ້ ແລະ ອື່ນໆ ຊຶ່ງຖ້າຫາກເຫຼືອຈາກທີ່ພີ່ນ້ອງນຳໄປທາງບໍລິສັດກໍຈະນຳໄປໃຊ້ປະໂຫຍດໃນການອະນຸຮັກທຳມະຊາດຕໍ່ໄປ.

ຢ່າງໃດກໍຕາມ ວິທີການເຮັດສົບແບບນີ້ຖືວ່າເປັນມິດຕໍ່ສິ່ງແວດລ້ອມກວ່າການສີດນໍ້າຢາໃຫ້ສົບແລ້ວໃສ່ໂລງຝັງດິນ ຫຼື ວິທີຈູດທີ່ຕ້ອງມີການເຜົາໄໝ້ຊຶ່ງເປັນເລື່ອງທີ່ສິ້ນເປືອງພະລັງງານ ທັງຍັງເປັນການປ່ອຍແກ໊ສກາກບອນສູ່ຊັ້ນບັນຍາກາດໃນປະລິມານມະຫາ ສານອີກດ້ວຍ, ທັງນີ້ ທາງບໍລິສັດຄາດຄະເນວ່າຜູ້ໃຊ້ບໍລິການຍ່ອຍສະຫຼາຍສົບແບບທຳມະຊາດ 1 ລາຍຈະຊ່ວຍຫຼຸດປະລິມານການ ປ່ອຍແກ໊ສກາກບອນໄດ້ເຖິງ 1 ໂຕນ, ໂດຍຕ້ອງເສຍຄ່າໃຊ້ຈ່າຍປະມານ 5.500 ໂດລາຕໍ່ 1 ສົບ.

ນອກຈາກວິທີດັ່ງກ່າວຈະຊ່ວຍຫຼຸດປະລິມານການປ່ອຍແກ໊ສກາກບອນແລ້ວ ຍັງສາມາດຜະລິດດິນທີ່ອຸດົມສົມບູນ ແລະ ສາມາດນຳໄປໃຊ້ໃຫ້ເກີດປະໂຫຍດໄດ້ອີກດ້ວຍ, ວິທີນີ້ຖືເປັນສິ່ງທີ່ມີຄຸນຄ່າ ແລະ ເຮັດໃຫ້ພິທີສົບມີຄວາມໝາຍຍິ່ງຂຶ້ນ.

 

 

ຮຽບຮຽງ: ເພັງສະຫວັນ

ຮູບພາບ: khaosod

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.