ກົດໃໝ່… ຄົນໃຊ້ມືຖືໃນຈີນຕ້ອງໄດ້ສະແກນໃບໜ້າຂອງຕົນເອງ

0
380

ປະຊາກອນໃນ ສປ ຈີນຕ້ອງຖືກສະແກນໃບໜ້າເມື່ອລົງທະບຽນໃຊ້ບໍລິການໂທລະສັບມືຖື ໃໝ່ ເພາະທາງການຕ້ອງການກວດສອບການມີຕົວຕົນຂອງຜູ້ໃຊ້ງານທາງອິນເຕີເນັດ, ຊຶ່ງກົດດັ່ງກ່າວປະກາດອອກມາເດືອນກັນຍາ 2019 ແລະ ມີຜົນບັງຄັບໃຊ້ເມື່ອວັນທີ 1 ທັນ ວາຜ່ານມາ.

ໂດຍລັດຖະບານລະບຸວ່າ: ຕ້ອງການ “ປົກປ້ອງສິດ ແລະ ຜົນປະໂຫຍດອັນຊອບທຳຂອງພົນລະເມືອງໃນໂລກໄຊເບີ” ຂະນະນີ້ຈີນໄດ້ໃຊ້ເຕັກໂນໂລຊີຈື່ຈຳໃບໜ້າໃນການສຳຫຼວດປະຊາກອນແລ້ວ ຊຶ່ງຈີນເປັນຜູ້ນຳໃນໂລກຂອງເຕັກໂນໂລຊີປະເພດນີ້ ແຕ່ການນຳລະ ບົບດັ່ງກ່າວນີ້ໄປນຳໃຊ້ທົ່ວປະເທດທີ່ເພີ່ມຫຼາຍຂຶ້ນໃນຊ່ວງບໍ່ເທົ່າໃດປີຜ່ານມາໄດ້ເຮັດໃຫ້ເກີດການໂຕ້ຖຽງກັນເປັນວົງກວ້າງ.

ກົດໃໝ່ແມ່ນຫຍັງ? ປັດຈຸບັນຕອນລົງທະບຽນເພື່ອໃຊ້ໂທລະສັບມືຖືໃໝ່ ຫຼື ເຮັດສັນຍາໃນການໃຊ້ອິນເຕີເນັດຜ່ານທາງໂທລະສັບ, ປະຊາຊົນຈະຕ້ອງສະແດງບັດປະຈຳຕົວ (ເຊັ່ນດຽວກັບຫຼາຍໆປະເທດທົ່ວໂລກ) ແລະ ຕ້ອງຖືກຖ່າຍຮູບເກັບໄວ້ເພື່ອເປັນຫຼັກຖານ ແຕ່ມາຮອດປັດຈຸບັນ ທຸກຄົນທີ່ຈະເຂົ້າໃຊ້ບໍລິການຕ່າງໆຜ່ານທາງໂທລະສັບມືຖືຕ້ອງຖືກສະແກນໃບໜ້າເພື່ອກວດສອບການມີ ຕົວຕົນ.

ທັງນີ້ ສປ ຈີນ ໄດ້ພະຍາຍາມນຳກົດດັ່ກ່າວມາໃຊ້ກັບທຸກຄົນທີ່ໃຊ້ອິນເຕີເນັດມາຫຼາຍປີແລ້ວ, ເພື່ອໃຫ້ຜູ້ທີ່ໃຊ້ງານອິນເຕີເນັດໃຊ້ຊື່ແທ້ຂອງຕົນເອງໃນໂລກອອນລາຍ. ຍົກຕົວຢ່າງ ເມື່ອປີ 2017 ມີການອອກກົດໃໝ່ຫຼາຍຂໍ້ທີ່ກຳນົດໃຫ້ບໍລິການຫຼາຍຢ່າງທາງອິນເຕີເນັດກວດສອບເອກະລກທີ່ແທ້ຈິງຂອງຜູ້ໃຊ້ງານກ່ອນອະນຸຍາດໃຫ້ເຂົາເຈົ້າໂພສເນື້ອຫາທາງໂລກອອນລາຍ.

ຊຶ່ງກົດໃໝ່ສຳລັບຜູ້ໃຫ້ບໍລິການໂທລະຄົມມະນາຄົມຖືກກຳນົດຂຶ້ນມາໂດຍກະຊວງອຸດສາ ຫະກຳ ແລະ ເຕັກໂນໂລຊີເພື່ອເປັນຊ່ອງທາງໃນການເຮັດໃຫ້ລະບົບນີ້ເຂັ້ມແຂງຂຶ້ນ ແລະ ລັດຖະບານສາມາດລະບຸຕົວຕົນໃຊ້ງານທາງໂທລະສັບມືຖືທຸກຄົນໄດ້, ຜູ້ໃຊ້ງານອິນເຕີເນັດສ່ວນໃຫຍ່ໃນຈີນເຂົ້າເວັບໄຊຕ່າງໆຜ່ານທາງໂທລະສັບມືຖື.

ຂະນະທີ່ນັກວິໄຈດ້ານປັດສະຍາປະດິດຂອງຈີນທີ່ມະຫາວິທະຍາໄລຊື່ດັງກ່າວວ່າ: ໜຶ່ງໃນແຮງຈູງຂອງຈີນໃນການກຳຈັດຜູ້ໃຊ້ງານນິລະນາມໃຫ້ໝົດໄປທັງການໃຊ້ໂທລະສັບມືຖື ແລະ ອິນເຕີເນັດຄືການເພີ່ມຄວາມປອດໄພທາງໄຊເບີ້ ແລະ ຫຼຸດການຫຼອກລວງທາງອິນເຕີເນັດ, ແຕ່ແຮງຈູງໃຈທີ່ເປັນໄປໄດ້ອີກຢ່າງໜຶ່ງກໍຄື: ການຕາມແກະຮອຍປະຊາຊົນທີ່ມີປະສິດທິພາບດີຍິ່ງຂຶ້ນ, ມັນກ່ຽວຂ້ອງກັບການຊຸກຍູ້ຈາກສ່ວນກາງທີ່ພະຍາຍາມຈະຕິດຕາມເບິ່ງທຸກຄົນ ຫຼື ຢ່າງໜ້ອຍກໍຄືຄວາມປາຖະໜາທີ່ຈີນຕ້ອງການ”.

ແລ້ວປະຊາຊົນມີຄວາມກັງວົນ ຫຼື ບໍ່? ຕອນທີ່ມີການປະກາດນຳໃຊ້ກົດດັ່ງກ່າວເມື່ອເດືອນກັນຍາສື່ຈີນບໍ່ໄດ້ເຫັນເປັນເລື່ອງໃຫຍ່ ແຕ່ໃນໂລກອອນລາຍຜູ້ໃຊ້ງານໂຊຊຽວຫຼາຍຮ້ອຍຄົນໄດ້ສະແດງຄວາມວິຕົກກັງວົນກ່ຽວກັບການທີ່ທາງການເກັບຂໍ້ມູນຂອງເຂົາເຈົ້າເພີ່ມຫຼາຍຂຶ້ນ “ຜູ້ຄົນກຳລັງຖືກຈັບຕາເບິ່ງຢ່າງເຂັ້ມງວດຫຼາຍຂຶ້ນເລື້ອຍໆ”.

ຢ່າງໃດກໍຕາມ ກໍມີຂໍ້ເສຍທີ່ເກີດຂຶ້ນຈາກເຕັກໂນໂລຊີນີ້ເຊັ່ນກັນ, ກ່ອນໜ້ານີ້ໃນປີນີ້ສາສະດາຈານມະຫາວິທະຍາໄລຄົນໜຶ່ງໄດ້ຟ້ອງສວນສັດວ່າບັງຄັບໃຊ້ເຕັກໂນໂລຊີຈື່ຈຳໃບໜ້າ ກັບຜູ້ເຂົ້າຢ້ຽມຊົມສວນສັດທຸກຄົນ, ເຮັດໃຫ້ເກີດຄຳຖາມ ແລະ ຂໍ້ໂຕ້ຖຽງຢ່າງກວ້າງຂວາງກ່ຽວກັບການເກັບຂໍ້ມູນພົນລະເມືອງເພີ່ມຫຼາຍຂຶ້ນຂອງທາງການຈີນ.

ຂະນະທີ່ເມື່ອເດືອນກັນຍາຜ່ານມາ ລັດຖະບານຈີນກໍໄດ້ລະບຸວ່າ: ມີແຜນທີ່ຈະ “ຈຳກັດ ແລະ ຄວບຄຸມ” ການໃຊ້ງານເຕັກໂນໂລຊີຈື່ຈຳໃບໜ້າໃນໂຮງຮຽນ, ຫຼັງຈາກມີລາຍງານວ່າມະຫາວິທະຍາໄລແຫ່ງໜຶ່ງໄດ້ທົດລອງໃຊ້ເຕັກໂນໂລຊີໃນການກວດສອບການເຂົ້າຫ້ອງຮຽນ ແລະ ພຶດຕິກຳຂອງນັກສຶກສາ.

 

ຮຽບຮຽງ: ເພັງສະຫວັນ

ຮູບພາບ: bbc.com/thai

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.