ການແຂ່ງຂັນອ໊ອບໂຣດນາໆຊາດຈະຈັດຂຶ້ນໃນຕົ້ນເດືອນສິງຫາ 2019 ນີ້

0
183

ເມື່ອວັນທີ 5 ກໍລະກົດ 2019 ຜ່ານມາທີ່ສະໂມສອນໂອແລມປິກແຫ່ງຊາດລາວ ສະຫະພັນກີລາລົດໃຫຍ່ ແລະ ລົດຈັກ ແຫ່ງຊາດລາວ ໂດຍຮ່ວມກັບກະຊວງສຶກສາທິການ ແລະ ກີລາ ໄດ້ຈັດພິທີຖະແຫຼງຂ່າວແຂ່ງຂັນລົດໃຫຍ່ “ອ໊ອບໂຣດນາໆຊາດ” ຊີງຂັນລັດຖະມົນຕີກະຊວງສຶກສາທິການ ແລະ ກີລາ ປະຈໍາປີ 2019  ເປັນກຽດເຂົ້າຮ່ວມຂອງ ທ່ານ ບົວລານ ສິລິປັນຍາ ຮອງລັດຖະມົນຕີກະຊວງສຶກສາທິການ ແລະ ກີລາ ທ່ານ ແສງພອນ ພົນອາມາດ ຫົວໜ້າກົມກີລາລະດັບສູງ ທ່ານ ສົມພອນ ສະຫວັດວິພານ ປະທານສະຫະພັນກີລາລົດໃຫຍ່ ແລະ ລົດຈັກແຫ່ງຊາດລາວ ມບັນດາແຂກຖືກເຊີນ ແລະ ພາກສ່ວນກ່ຽວຂ້ອງ.

ທ່ານ ສົມພອນ  ໄດ້ກ່າວວ່າ ການແຂ່ງຂັນກີລາລົດໃຫຍ່ອ໊ອບໂຣດນາໆຊາດໃນປີນີ້ແມ່ນຈະຈັດຂຶ້ນໃນລະຫວ່າງວັນທີ 5-11 ສິງຫາ ທີ່ຈະມາເຖິງນີ້ ຢູ່ທີ່ເຂດເສດຖະກິດສະເພາະບຶງທາດຫຼວງ ເມືອງໄຊເສດຖາ ນະຄອນຫຼວງວຽງຈັນ ການແຂ່ງຂັນຄັ້ງນີ້ລວມມີ 6 ລຸ້ນຄື ລຸ້ນ ວີໄອພີ (VIP) ປີກນົກ ຄານແຂງ ທ່ຽວປ່າທົ່ວໄປ ທ່ຽວປ່າໂອເພັນ ແລະ ຊຸບເປີໂອເພັນ.

ສ່ວນລາງວັນແມ່ນມີດັ່ງນີ້ ລຸ້ນ VIP ອັນດັບ 1-5 ຈະໄດ້ຮັບຂັນລາງວັນ ພ້ອມຫຼຽນລາງວັນ (ບໍ່ມີເງິນລາງວັນ) ລຸ້ນປີກນົກມີ 5 ຂນລາງວັນ 5 ຫຼຽນລາງວັນ ພ້ອມເງິນລາງວັນທີ 1 ໄດ້ຮັບເງິນ 1.000 ໂດລາ 2 ໄດ້ຮັບເງິນ 500 ໂດລາ 3 ໄດ້ຮັບເງິນ 300 ໂດລາ 4 ໄດ້ຮັບເງິນ 150 ໂດລາ ແລະ ທີ 5 ໄດ້ຮັບເງິນ 100 ໂດລາ ລຸ້ນຄານແຂງ ແລະ ລຸ້ນທ່ຽວປ່າທົ່ວໄປ ລາງວັນແມ່ນຄືກັນກັບລຸ້ນປີກນົກ ສ່ວນລຸ້ນທ່ຽວປ່າໂອເພັນ ແລະ ລຸ້ນຊຸບເປີໂອເພັນລວມມີ 5 ຂັນລາງວັນ 5 ຫຼຽນລາງວັນ ຊຶ່ງອັນດັບທີ 1 ໄດ້ຮັບເງິນ 1.400 ໂດລາ 2 ໄດ້ຮັບເງິນ 700 ໂດລາ 3 ໄດ້ຮັບເງິນ 300 ໂດລາ 4 ໄດ້ຮັບເງິນ 200 ໂດລາ ແລະ ອັນດັບທີ 5 ໄດ້ຮັບເງິນມູນຄ່າ 100 ໂດລາ.

ການຈັດງານຄັ້ງນີ້ ນອກຈາກເປັນການ ສ້າງຂະບວນການແຂ່ງຂັນກີລາເພື່ອຕ້ອນຮັບວັນສໍາຄັນຕ່າງໆຂອງຊາດແລ້ວ ຍັງເປັນການຖອດຖອນບົດຮຽນຂອງບັນດານັກກີລາ (ລະຫວ່າງນັກກີລາລາວກັບນັກກີລາຕ່າງປະເທດ) ທັງເປັນການສ້າງກີລາປະເພດນີ້ໃຫ້ເປັນທີ່ຮູ້ຈັກກັນຫຼາຍຂຶ້ນເພື່ອກ້າວໄປສູ່ການແຂ່ງຂັນໃນລະດັບພາກພື້ນກໍຄືສາກົນ.

 

 

 

ຮຽບຮຽງ: ສະຫະລັດ ວອນທິວົງໄຊ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.