ກອງປະຊຸມພົບປະສອງຝ່າຍກອງທັບ “ລາວ ແລະ ກຳປູເຈຍ” ບັນລຸຜົນສຳເລັດດ້ວຍດີ

0
125

ອີງຕາມການລາຍງານຂ່າວຂອງໜັງສືພິມກອງທັບປະຊາຊົນລາວ ສະບັບວັນທີ 27 ສິງຫາ 2019 ຊຶ່ງໄດ້ລາຍງານກ່ຽວກັບກອງປະຊຸມພົບປະສອງຝ່າຍລະຫວ່າງສອງກອງທັບລາວ ແລະ ກຳປູເຈຍກ່ຽວກັບກຳນົດການຖອນກຳລັງອອກຈາກບໍລິເວນຈຸດພິກັດ (E0523410 N1579776) ເຂດຄົງຄ້າງທີ່ຍັງບໍ່ທັນໄດ້ປັກຫຼັກໝາຍ.

ຊຶ່ງສອງຝ່າຍ “ລາວ-ກຳປູເຈຍ” ໄດ້ຕົກລົງກັນວ່າ ເມືອງມຸນລະປະໂມກ ແຂວງຈຳປາສັກ ສປປ ລາວໄດ້ຈັດຂຶ້ນ ໃນວັນທີ 27 ສິງ ຫາ 2019 ນີ້ທີ່ດ່ານປະເພນີຫາງດອນຂະເໝົາ ເມືອງໂຂງ ແຂວງຈຳປາສັກ ຝ່າຍລາວນຳໂດຍ ທ່ານພົນ ຈັດຕະວາ ສຸໄກ ພິມມະສານ ຫົວໜ້າການທະຫານ ກອງບັນຊາການທະຫານແຂວງຈຳປາສັກ (ເປັນຫົວໜ້າຄະນະ) ຝ່າຍກຳປູເຈຍນຳໂດຍ ທ່ານ ພົນຕີ ດວງຈັນ ຜູ້ບັນຊາການກອງພົນນ້ອຍທີ 9 ກອງທັບຣາຊະອານາຈັກກຳປູເຈຍ (ເປັນຫົວໜ້າຄະນະ) ກອງປະຊຸມໄດ້ພ້ອມກັນຕົກ ລົງເປັນເອກະພາບໃນບັນຫາສຳຄັນດັ່ງນີ້.

1. ສອງຝ່າຍເຫັນດີຖອນກຳລັງທະຫານຂອງຕົນອອກຈາກບໍລິເວນໄຮ່ເຂົ້າຈຸດພິກັດ (E0523410 N1579776) ກັບຄືນສູ່ຈຸດທີ່ຕັ້ງເດີມຂອງຕົນ.

2. ສອງຝ່າຍເຫັນດີເປັນເອກະພາບຈັດຕັ້ງຄະນະກຳມະການຮ່ວມເພື່ອສັງເກດການ ແລະ ກວດກາການຖອນກຳລັງທະຫານຂອງທັງສອງຝ່າຍຊຶ່ງກຳນົດເອົາຝ່າຍລະ 5 ຄົນ.

3. ສອງຝ່າຍເຫັນດີກຳນົດເວລາການຈັດຕັ້ງປະຕິບັດການຖອນກຳລັງທະຫານຂອງຕົນອອກຈາກຈຸດດັ່ງກ່າວ ເລີ່ມແຕ່ ເວລາ 8:00-11:00 ໂມງຂອງວັນທີ 29 ສິງຫາ 2019 ໃຫ້ສຳເລັດ.

ການຈັດກອງປະຊຸມຄັ້ງນີ້ແມ່ນປະຕິບັດຕາມຄຳສັ່ງຂອງສອງນາຍົກລັດຖະມົນຕີແຫ່ງ ສປປ ລາວ ແລະ ຣາຊະອານາຈັກກຳປູເຈຍ ຊຶ່ງກອງປະຊຸມໄດ້ດຳເນີນໄປດ້ວຍຜົນສຳເລັດຢ່າງຈົບງາມບົນພື້ນຖານໄມຕີຈິດມິດຕະພາບ ແລະ ຄວາມເຂົ້າອົກເຂົ້າໃຈຊຶ່ງກັນ ແລະ ກັນ ເພື່ອສ້າງໃຫ້ຊາຍແດນຂອງສອງປະເທດເປັນຊາຍແດນແຫ່ງສັນຕິພາບ ມິດຕະພາບ ແລະ ການພັດທະນາຢ່າງແທ້ຈິງ.

 

 

ພາບ ແລະ ຂໍ້ມູນຈາກ : ໜັງສືພິມກອງທັບປະຊາຊົນລາວ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.