ກອງປະຊຸມບັນດາພາຄີອະນຸສັນຍາສາກົນ ວ່າດ້ວຍການຕ້ານການໃຊ້ສານກະຕຸ້ນຕ້ອງຫ້າມ

0
1244

ກອງປະຊຸມຄັ້ງທີ 7 ຂອງບັນດາພາຄີອະນຸສັນຍາສາກົນ ວ່າດ້ວຍການຕ້ານການໃຊ້ສານກະຕຸ້ນຕ້ອງຫ້າມໃນກິລາ (7th session of the Conference of Parties to the International Convention against Doping in Sport) ໄດ້ຈັດຂຶ້ນຢ່າງເປັນທາງການໃນລະຫວ່າງທ້າຍເດືອນຕຸລາຜ່ານມາທີ່ສຳນັກງານໃຫຍ່ອົງການອຸຍແນສໂກ ນະຄອນຫຼວງປາຣີ ປະເທດຝຣັ່ງໂດຍຕາງໜ້າ ສປປ ລາວ ເຂົ້າຮ່ວມກອງປະຊຸມໃນຄັ້ງນີ້ມີ ທ່ານ ຈັນສະໝອນ ປຣະສອນໄຊ ທີ່ປຶກສາດ້ານການສຶກສາ ແລະ ວັດ ທະນະທຳປະຈຳສະຖານເອກອັກຄະລັດຖະທູດແຫ່ງ ສປປ ລາວ ທີ່ປາຣີ ພ້ອມດ້ວຍຄະນະ, ມີຄະນະຜູ້ແທນຂັ້ນສູງຈາກອົງການສາ ກົນເພື່ອຕ້ານການໃຊ້ສານຕ້ອງຫ້າມໃນກີລາ, ຄະນະກຳມະການໂອລິມປິກສາກົນ ແລະ ຕົວແທນຈາກບັນດາພາຄີຫຼາຍກວ່າ 500 ທ່ານຈາກ 188 ປະເທດເຂົ້າຮ່ວມ.

ກອງປະຊຸມໄດ້ທົບທວນຄືນບັນດາມະຕິຂອງກອງປະຊຸມຄັ້ງທີ 6 ແລະ ຜົນການຈັດຕັ້ງປະຕິບັດຜ່ານມາ, ພ້ອມທັງໄດ້ກຳນົດແຜນ ການໃນຕໍ່ໜ້າ ໃນນັ້ນ, ກອງປະຊຸມໄດ້ປຶກສາຫາລືກ່ຽວກັບການບໍລິຫານຈັດການກອງທຶນເພື່ອລຶບລ້າງການໃຊ້ສານກະຕຸ້ນຕ້ອງຫ້າມໃນກີລາ ແລະ ບັນຫາອື່ນໆທີ່ເປັນສິ່ງທ້າທາຍຕໍ່ການກີລາ, ກອງປະຊຸມໄດ້ດຳເນີນໄປຢ່າງຈົບງາມໂດຍມີການປະກອບຄຳຄິດເຫັນຢ່າງຟົດຟື້ນຈາກຜູ້ເຂົ້າຮ່ວມເພື່ອຫາທາງຮ່ວມມືກັນຕ້ານການໃຊ້ສານກະຕຸ້ນຕ້ອງຫ້າມໃນກີລາ ແລະ ສົ່ງເສີມການແຂ່ງຂັນກີລາແບບບໍລິສຸດ, ຍຸຕິທຳ ແລະ ມີຄວາມສະເໝີພາບເທົ່າທຽມກັນ.

ນອກຈາກນັ້ນ, ກ່ອນໜ້າກອງປະຊຸມຈະເປີດຂຶ້ນຍັງມີກອງປະຊຸມເວທີປຶກສາຫາລືຂອງບັນດານັກວິຊາການ ແລະ ຄູ່ຮ່ວມໃນ 3 ຫົວຂໍ້ທີ່ກ່ຽວຂ້ອງກັບກອງປະຊຸມຄື: 1. ປັນຍາປະດິດ ແລະ ການກະຕຸ້ນພັນທຸກຳ (Artificial Intelligence and Gene Doping), 2. ການສຶກສາໂດຍເນັ້ນຄຸນນະພາບ (Values-Based Education) ແລະ 3. ການມີສ່ວນຮ່ວມຂອງແມ່ຍິງ ແລະ ຊາວໜຸ່ມເຂົ້າໃນການກີລາ (Women and Youth engagement in sport).

ກອງປະຊຸມດັ່ງກ່າວຈັດຂຶ້ນທຸກ 2 ປີ, ໂດຍ ສປປ ລາວ ໄດ້ເຂົ້າເປັນພາຄີຂອງອົງການຕ້ານສານກະຕຸ້ນຕ້ອງຫ້າມໃນກີລາສາກົນ ເປັນປະເທດທີ 184 ໃນປີ 2017 ໂດຍແມ່ນຫ້ອງການປະສານງານຕ້ານສານຕ້ອງຫ້າມແຫ່ງຊາດລາວເປັນຜູ້ປະສານງານ.

 

ໂດຍ: ດອກຕາເວັນ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.